Movimientu Obreru: columna vertebral de l’Asturies del sieglu XX

Asturies foi, a lo llargo del sieglu XX, xunto a Cataluña y el País Vascu, una de les rexones más industrializaes y con mayor arraigonamientu del movimientu obreru n’España. La minería del carbón y la metalurxa tuvieron pola economía asturiana, escasamente diversificada y siempre dependiente de la proteición estatal. Al rodiu d’estos sectores configuróse’l poblamientu de la faza central d’Asturies, estructuróse la sociedá y articuláronse, en gran parte, les organizaciones sociopolítiques y los conflictos sociales. Al empar, la imaxe d’Asturies permaneció venceyada a la condición de fortaleza obrera, personificada na combatividá d’unos mineros que protagonicen en 1934 un llevantamientu revolucionariu y conviértense na dictadura franquista en referencia obligada pa tola oposición. Dalgunes d’eses lluches algamaron la condición de finxos de referencia y revistiéronse d’una épica que perpetuaba la so memoria.

Cuando hebo condiciones democrátiques, la hexemonía social, política y (dacuando) cultural tuvo en manes d’una clas obrera organizada y con alta capacidá de movilización. Y cuando hebo dictadura –sobre manera nel Franquismu– el movimientu obreru asturianu foi una de les principales fuercies de la resistencia democrática. Nes cuenques mineres y les ciudaes industriales consolidáronse comunidaes obreres bien afitaes y políticamente mui actives. Socialistes, anarcosindicalistes y comunistes llograron una firme implantación. Los valores de la cultura obrera y la solidaridá de clas foron socializaos hasta dar en predominantes y arraigonaron lo suficiente como pa siguir vixentes baxo les condiciones represives de la dictadura que vieno tres la guerra. El declive industrial socavó eses bases al tiempu qu’amosaba les sos raíces fuertes.