Pozu San Luis

Nel 1925 Carbones de La Nueva, una empresa minera de llarga tradición nel valle llangreanu del ríu Samuño, ye adquirida pola Real Compañía Asturiana de Minas (RCAM) que, dende’l pieslle de la decana Mina d’Arnáu (Castrillón) nel 1915, había abastecese nel mercáu de toles necesidaes enerxétiques del grupu. Pa ello, Carbones de La Nueva afrontará horizontes d’esplotación y d’organización nuevos, que pasen pol afondamientu d’un pozu vertical para dir abandonando la minería de monte. Nacía así una pieza nueva na vega del ríu Samuño: el Pozu San Luis.

Nel espaciu de producción del San Luis rescampla l’edificiu de la casa de máquines, construyíu ente’l 1928 y el 1930, y ampliáu nos años cuarenta ensin alteriar el so aspeutu formal. Trátase d’un edificiu de guapura singular, con abondos detalles como frontones, cornises escalonaes, pináculos de zinc…, obra del arquiteutu de la compañía D. Tomás Acha Zulaica, que sorprende dientro del panorama sobriu de la arquiteutura industrial minera. Nel so interior agóspiase la fantástica máquina d’estraición de la casa Siemens, del 1929, asina como’l grupu convertidor Leonard, y los compresores, de les firmes Ingersoll o Worthington, toes xoyes de la historia de la teunoloxía.

Xuníu a la casa de máquines, al traviés de los cables d’estraición, llevántase’l castillete, un exemplu escelente de la téunica de celosía de fierro roblonada. El restu de los edificios del pozu tienen, quiciabes, menor entidá que la casa de máquines, pero cuenten col enorme interés d’amosar la propia evolución de la instalación y de cómo se diríen reorganizando los usos y funciones na plaza del pozu: la casa d’aséu (antigua central llétrica), la llampistería (1934) o les oficines (1954).

Nel 1968 el pozu integraríase na firma estatal HUNOSA, que cesaría la esplotación aína. Sicasí les instalaciones siguieron n’actividá, como auxiliar del cercanu Pozu Samuño, lo que-y permitió llegar a los nuesos díes siendo ún de los pozos más guapos de la nuesa historia minera y una auténtica xoya teunolóxica.

Faustino Suárez Antuña