Pozu Sotón

La SMDF fadría l’afondamientu de Sotón xusto depués de Fondón, en Llangréu, lo que-y permitió incorporar meyores na mina nueva, construyendo un pozu más porosu na so trama interna y más eficiente teunolóxica y arquiteutónicamente.

Amás, los castilletes envuélvense n’altor con un tendeyón de clasificación de carbones o RETER (vocablu local resultante de l’adaptación del afamáu sistema Roetters de clasificación de carbones) con entrada direuta dende les xaules, creándose una auténtica planta perriba del nivel de superficie y constituyendo ún de los meyores exemplos mineros de lo que vieno a llamase ‘arquiteutura máquina’. Una planta de clasificación n’altor que se combinaba con unes tolves que permitíen la entrada direuta del ferrocarril, algamando con too ello una organización perfeuta de los llabores d’esterior y reduciendo al máximo la construcción de construcciones menores que torgaríen el funcionamientu de la plaza minera.

La pieza central del pozu queda constituyida pola casa de máquines y los castilletes, que xunto coles naves tipo Shed de l’antigua casa d’aséu y almacenes, asina como’l ventilador, asitiáu extramuros, constitúin el noyu fundacional d’una instalación edificada dafechu col concursu d’obreros de la compañía, como declaraba arguyosa la Duro.

La casa de máquines, ampliada nel 1954, nacía p’agospiar dellos compresores y dos potentes máquinas d’estraición, que siempre utilizaríen fluyíu llétricu suministráu dende grupos termoxeneradores comarcales creaos pola iniciativa de la Duro.

A partir d’ahí’l pozu siguiría medrando, pero con orde y harmonía creando volúmenes nuevos, como la magnífica casa d’aséu nueva, que caltienen la coherencia d’un pozu con 100 años de historia.

Faustino Suárez Antuña