Nel cine, l'ausencia de vanos nos murios esteriores contrasta cola vistosa fachada principal acristalada. Esta última dexa ver l'interior, nel que destaca un mural astractu que cubre'l techu del antepar de la segunda planta. El restu del perímetru, articuláu por mediu de fines moldures verticales, ta recubiertu con una superficie brillosa de gresite decorada con mosaicos con motivos xeométricos. El singular repertoriu decorativu del edificiu foi obra de los artistes Antonio Suárez (Xixón, 1923-2013) y Jesús Díaz, conocíu como Zuco (Llangréu, 1929 - Madrid, 2010).
El cine Felgueroso inauguróse'l 4 d'avientu de 1959 cola proyeición de la película Horizontes de grandeza (Willian Wyler, 1958) y caltuvo la so programación diaria hasta l'añu 2000. Siete años más tarde foi adquiríu pol Ayuntamientu de Llangréu pa convertise en centru cultural y audiovisual. El proyectu de rehabilitación del edifico foi obra del arquitectu Jovino Martínez Sierra. Incluyó la reordenación de la sala de proyeición de la planta baxa y l’entresuelu, y la creación de nuevos espacios nes plantes cimeres pa dar cabida al futuru Centru Audiovisual.
Na actualidá caltien una programación estable con ciclos de cine y otres actividaes. Dispon, amás, de filmoteca, videoteca y fototeca, y alluga una esposición permanente de más de quinientes cámares de cine y fotografía. Ye d’interés l'importante llabor desendolcáu nel Cine Felgueroso pol alderique cinematográficu Sala Escura, formáu en 1990 coles mires de ver, esparder y comentar el cine.
Mónica García Cuetos
Comentaris recents