por Eduardo Núñez Fernández
Ye llicenciáu en Xeografía ya Historia, téunicu superior d’archivos, archiveru municipal y xefe del Serviciu d’Archivu y Documentación del Conceyu de Xixón. Asoleyó dellos trabayos sobre archivística, historia llocal y rexonal y patrimoniu documental.
Asturies guarda un ricu llegáu documental productu del so pasáu industrial: son los archivos industriales y mercantiles, en dalgunos casos, l’únicu testimoniu material pa documentar esa parte de la nuesa historia.
Si hai daqué que carauterizó al territoriu asturianu dende principios del sieglu XIX y entá primero ye’l so calter industrial simbolizáu nes mines de carbón y na siderurxa como motores d’esa febril y variada actividá xunto con otres industries y servicios auxiliares (ferrocarriles, astilleros, talleres, poblaos, etc.) necesarios pal so desendolcu.
Poro, falar d’archivos n’Asturias ye falar tamién d’archivos industriales y mercantiles, mineros, fabriles, del comerciu y de la banca porque esos archivos son productu d’esa historia industrial y mercantil asturiana y cuando güei munches güelgues físiques d’esi pasáu yá se sumieron ellos representen l’únicu testigu que fai posible recordar y revivir esa historia y el principal instrumentu de los investigadores pa documentar esi pasáu. Equí citamos dellos de los mas emblemáticos que llograron sobrevivir a munches circunstancies adverses magar que causa tristura saber que munchos otros nun foron a llegar a los nuesos díes pa contanos la so historia.
Ye preciso estremar ente archivos (fondos documentales) y centros (archivísticos o non) au se conserven los fondos; l’archivu de la Real Compañía Asturiana de Mines consérvase al pie de la fábrica que lu creó, n’Arnáu (Castrillón), mientres que l’archivu d’ENSIDESA (Avilés) se conserva nel Archivu Históricu d’Asturies (Uviéu). Los grandes nomes de la industrialización asturiana refléxense nos archivos d’empresa conservaos: ENSIDESA, Real Compañía Asturiana de Mines, Asturiana de Zinc, Juliana Constructora Xixonesa, Fábrica de Mieres, Sociedá Metalúrxica Duro-Felguera, Hulleres de Veguín y Olloniego, Sociedá Hullera Española, Hulleres del Turón, HUNOSA, Industrial Química del Nalón, Fábrica d’Armes de Trubia, Hidrocantábrico, Fábrica d’Armes d’Uviéu, UNINSA, HULLASA, Fábrica de Tabacos de Xixón, Ferrocarril de Llangréu, Ferrocarril Vasco-Asturiano, Bancu Herrero, Casa Masaveu. Fuera d’Asturias hai otros fondos que completen los conservaos equí, talu ye’l casu del archivu del INI (Institutu Nacional d’Industria, 1941-1995. Madrid) yá que les empreses públiques asturianes taben inxertes nél.
NÚÑEZ FERNÁNDEZ, E. (Coord.) Estudio básico sobre el patrimonio documental industrial asturiano: los archivos históricos industriales y mercantiles, INCUNA, Ediciones Trea. 2000.
NÚÑEZ FERNÁNDEZ, E., “Archivos de empresa en Asturias”, en Patrimonio industrial de Asturias: 33 propuestas de industria, cultura y naturaleza, Consejería de Cultura y Turismo del Principado de Asturias, CICEES, 2010.
NÚÑEZ FERNÁNDEZ, E., “Los archivos de empresa en Asturias y España”, en ÁLVAREZ ARECES, M.A. (Coord.), El legado de la industria: archivos, bibliotecas, fototecas de empresas. Fábricas y memoria, INCUNA-CICEES, 2016.
PAREDES NAVES, M.C., “El patrimonio documental empresarial en el Archivo Histórico de Asturias”, en ÁLVAREZ ARECES, M.A. (Coord.), El legado de la industria: archivos, bibliotecas, fototecas de empresas. Fábricas y memoria, INCUNA-CICEES, 2016.
TIELVE GARCÍA, N.; DÍAZ GONZÁLEZ, M.M., “El patrimonio documental de la Fábrica de Armas de Oviedo”, en Patrimonio Industrial de la guerra en tiempos de paz, CICEES, INCUNA, 2006.
Comentaris recents