Equipamientos urbanos na Asturies industrial

Dende mediados del s. XIX, la industrialización desencadenó n’Asturies cambeos económicos, demográficos y sociales decisivos que tresformaron la morfoloxía, función ya imaxe de munches ciudaes y villes. La nueva ciudá industrial reflexaría na so naturaleza dual la prosperidá creciente de la minoría burguesa capitalista y la precariedá dafechu de una mayoría popular proletarizada. Nesti contestu urbanu, non poques iniciatives, de calter públicu, priváu o mestu, intentaron responder a demandes d’estremada mena, afeutando a cuestiones como’l consumu, la educación o’l tiempu d’ociu: remanaceríen d’esti mou infraestructures y equipamientos diversos, con un decidíu espíritu modernizador. Los mercaos d’abastos ofrecieron, siguiendo premises hixenistes y racionalistes, una marcación digna pa la distribución comercial de productos de consumu diariu: a pesar de les variaciones materiales –fierro, fábrica, formigón– y estilístiques –del eclecticismu de raigañu ochocentista al funcionalismu d’enteguerres–, suel repetise un espaciu «tipu» con planta rectangular, diáfanu y cubiertu, casu de los mercaos de Villaviciosa, Mieres y Ribeseya. Nesta corriente encaxen los mataderos, pensaos pa garantizar un sacrificio acionáu de los reses y procesamientu de la carne (mataderu de Llangréu).

La esmolición pola instrucción popular, axuntada a les pretensiones paternalistes del empresariáu, daría llugar a fundaciones educatives, como la escuela de La Salle (La Felguera), creada en 1902 por Duro-Felguera como centru docente pa fíos d’obreros y posteriormente dotada con una Escuela d’Artes y Oficios (1917). Pa cabu, hai que facer referencia al aguapamientu del paisaxe urbanu con elegantes parques públicos: los conceyos, encontándose dacuando na interesada arrogancia de la burguesía industrial asturiana, promovieron la creación d’estos recintos, faciendo posible l’espardimientu de les clases trabayadores (parque Dorado en Sama, parque Dolores Fernández Duro en La Felguera).