Patrimoniu Industrial: Dimensión artística y valores culturales

Sigfried Giedion nel so célebre ensayu La mecanización toma’l mandu nun duldó al considerar el cultivu del progresu, la téunica y la máquina como los más elementales pilares sobre los que se llevantó la sociedá contemporánea: enerxía, dinámica, funcionalidá, adaptabilidá, seriación, estandarización, racionalidá…, valores, atributos y perceiciones íntimamente venceyaos a la mecanización. Valores que tuvieron una innegable repercusión nes formes de vida y de pensamientu, nel tiempu y nel espaciu, nes manifestaciones culturales y artístiques, tanto na so dimensión simbólica como significativa.

El mundu del trabayu, l’orde llaboral, el paisaxe y, cómo non, l’espaciu vivíu pueden rastrexase y reconocese en diferentes llinguaxes que van dende la pintura a la música, pasando pela escultura, el cine, la fotografía, el cómic y otres propuestes creatives. El frutu de toes estes esperiencies son imáxenes, pallabres, aiciones y evocaciones – materiales y inmateriales– qu’ayuden a diseñar un rellatu, el de la industrialización. Tou un universu de representaciones que, dende’l so potencial comunicativu y espresivu, contribúin a crear y recrear, a construyir y reconstruyir, la memoria del trabayu y de la industria. Ecos d’un saber facer y d’un saber tar, d’unos oficios, unes costumes y una sociabilidá que foron diliéndose inevitablemente.

Una dimensión cultural y artística qu’engarza’l pasáu col presente y sobre la que se llevanta una identidá na que podemos reconocenos: la identidá industrial. La propia d’un patrimoniu estremadamente feble, sistemáticamente amenazáu por una perversa actitú postmoderna –onde la trivialización va llamentablemente asociada a la espectacularización– dende la qu’acecha’l llau más escuru de Saturnu: el lligáu al afán y l’ansia de modernización, alimentáu pola cobicia y la fiebre valtadora. Frente a ello namái queda un camín, el del conocimientu, la reflexón y la comunicación. Y ye que sólo’l que conoz respeta.