Archivos
La Sociedad Fábrica de Mieres constituyóse’l 23 de marzu de 1879 como heredera directa de diverses sociedaes encargaes, yá dende'l segundu terciu del sieglu XIX, de la esplotación de hulla y de la producción de fierro nel conceyu. La complexa secuencia de la so formación, na que fueron sucediéndose distintes empreses de curtia vida, ye un reflexu de los cambiantes y difíciles entamos de la industrialización n'Asturies. El so primer antecedente, l'Asturian Mining Company, empresa pionera nestes actividaes, dio llugar en 1848 a la creación de la factoría de lo que depués foi Fábrica de Mieres, empresa allugada na Vega Sueros, ente Ablaña y Mieres del Camín (1844-1849). El so fracasu acabó cola constitución en 1852 d'una nueva sociedá, la Compagnie Minière et Métallurgique des Asturies, dependiente de Grimaldi et Cie. (1852-1865). Esta dio pasu a la Societé Houillère et Métallurgique des Asturies, que vio la so liquidación en 1870. Esti fechu motivó la constitución d'una nueva compañía por parte del so antiguu director, la Sociedad Numa Gilhou (1871- 1879), denominada yá dende 1879 Sociedad Fábrica de Mieres.
Con estos inestables antecedentes, Fábrica de Mieres consolidóse nos caberos años del sieglu XIX, cuando foi adquiriendo nuevos bienes y concesiones mineres, fundamentalmente nos conceyos de Quirós y L.lena. Esti espoxigue vióse tamién favorecíu pol desendolcu de les infraestructures de tresporte (fundamentalmente, les del ferrocarril) y pol impactu de la Guerra Mundial. Sicasí, la crisis manifestada claramente yá dende finales de los años trenta acabó favoreciendo la so integración en 1961 na Unión de Siderúrgicas Asturianas, S.A. (UNINSA), una sociedá formada poles principales empreses privaes asturianes del sector. A entamos de los setenta, UNINSA pasó a integrase na siderurxa pública (ENSIDESA), y les instalaciones de Fábrica de Mieres fueron esmantelaes poco a poco dientro de la estratexa de viabilidá diseñada pola citada corporación siderúrxica.
Los primeros intentos d’incorporación al Archivu Municipal de Mieres del so fondu documental daten de mayu de 1980, cuando un dictame de la Comisión Informativa de Cultura plantegó dirixise a ENSIDESA pa negociar tal posibilidá. En 1984, un alcuerdu plenariu plantegó daqué similar, anque esta vegada en rellación cola familia Loring, propietaria de la parte más antigua y significativa del fondu documental. Sicasí, al Archuivu Municipal namás acabó incorporándose una pequeña fraición del fondu, rescatada de la destrucción na década de los noventa.
Dende los años noventa, la mayor parte del fondu documental ta allugada na actual sede de la entidá, en Xixón. Considerando la evolución de la empresa, tienen d'esistir partes del fondu nos archivos de l'antigua ENSIDESA y, no que cinca a determinaes concesiones mineres, nel Archivu d'HUNOSA.
La parte del fondu allugada nel Archivu Municipal de Mieres, bien amenorgada dende'l puntu de vista del so volume y de la so tipoloxía, ufierta datos interesantes sobro les primeres fases de desendolcu de la compañía.
La correspondencia d'entrada (d’ente 1878 y 1929, sobre too hasta 1894), que se caltien nuna secuencia prácticamente completa y constitúi el núcleu del fondu, apurre datos de los pidíos y procesos de fabricación, ufiertando una visión xeneral sobro los distintos clientes d’ámbitu nacional ya internacional. El restu de la documentación tien un calter puramente testimonial: matrices de valores de títulos d'aiciones (1927/1959), factures (1882/1888) y correspondencia de la Sociedad Caja de Socorros (1914/1916).
José María Fernández Hevia / Archivo Municipal de Mieres
GALERÍA D'IMAXES
Comentaris recents