Evidentemente esti procesu nun ye homoxeneu nel tiempu y depende de les fases espansives y regresives de la hulla, de la so rellación cola siderurxa de cabecera, de l’ameyoramientu de los salarios que permitirá’l desarrollo de los planes d’enanche y, finalmente, de la llexislación urbanística.
El periodu autárquicu de la dictadura militar del xeneral Franco afaló’l trabayu hulleru, siempre sobre la base d’unos salarios baxos qu’intentaben compensar la escasa inversión de capital por parte de los empresarios, pero que nun podíen incentivar el desarrollu inmobiliariu. Asina, la creación de los grupos de viviendes, tanto pol Instituto Nacional de la Vivienda (INV) como de la Obra Sindical del Hogar (OSH) y otros organismos dende la década del 1940, dotaron de vivienda xusta y digna a los trabayadores y lliberaron a les aldees d’agospiar amás a la mano d’obra inmigrante. Arrastró tamién a un primer grupu d’obreros autóctonos qu’abandonen los pueblos y entamen la proletarización definitiva.
Les conocíes como barriaes mineres que pueblen los nuesos territorios mineros tienen plantegamientos diferentes, sobresaliendo acaso dos modelos: el de los grandes grupos de vivienda del INV organizaos al rodiu de patios y con una ordenación fundada na plaza mayor hispana, proponiendo tratamientos estéticos neo-herrerianos (aleros, cubiertes, recercaos...) mui modificaos posteriormente; y el de los pequeños y medianos grupos de la OSH, con fachaes de lladriyu, volúmenes llendaos por murios llaterales con aplacáu de piedra artificial, qu’incorporen tamién zócalos y marquesines de los portales; los güecos d’escalera, n’ocasiones, zárrense con pavés.
Faustino Suárez Antuña
Comentaris recents