Barriu de Ḥunigru

Industries

Barriu de Ḥunigru

Trubia, Uviéu

373457898

Fábrica d'Armes de Trubia

374419314

Escuela d'Aprendices

375459648

Ferrocarril Trubia-Quirós

374448030

Barriu de Ḥunigru

374436986

Círculu d'Obreros

Un establecimientu industrial de les dimensiones de la Fábrica d’Armes de Trubia pronto necesitó cubrir les necesidaes de vivienda d’una plantía en crecimientu continuu. Dende los entamos, a lo último del sieglu XVIII, y hasta la metá del XIX, el recintu fabril axuntaría tanto la función productiva como la residencial, fechu que se caltuvo hasta l’últimu cuartu del sieglu XX.

La llegada d’Elorza a la direición de la factoría supunxo la creación del primer barriu obreru fuera del espaciu industrial, el más antiguu d’Asturies, el de Ḥunigru. Ocupó un solar na oriella derecha del ríu, frente a la fábrica –también se conoz como La Fábrica–, que venía faciendo les funciones de depósitu de minerales y otros materiales. El so nome, yá mencionáu na primer época de la empresa, paez tener rellación cola llegada de los armeros vascos y tener como raíz l’eusquera jon igaro, que significa dalgo asina como ‘al otru llau’, en referencia a la situación respeuto a los talleres, colos que comunicaba al traviés d’una ponte de madera que sufriría posteriores reformes hasta llegar a la so estructura actual.

Ḥunigru cuenta con trés cuarteles construyíos hacia’l 1850. El nomáu ‘del ríu’ conserva la so fisonomía y estructura orixinal; nació como casa-fragua, colos talleres na planta baxa y les viviendes na superior. Anguaño ta compuestu por viviendes apegaes nos sos dos pisos, rescamplando l’enmarcáu de lladriyu macizo de los sos vanos o l’enrexáu de los sos balcones, obra artística fecha na propia fábrica d’armes. El bloque ‘del mediu’ data del 1940, yá que l’orixinal valtóse nun bombardéu na Guerra Civil; amás de viviendes, contaba cola Gota de Lleche. Por último ta’l bloque ‘del monte’; orixinalmente tenía una sola planta, añadiéndose una segunda nel 1907 que cuenta con un magníficu corredor de madera y fierro.

Amás de la función residencial, Ḥunigru convirtióse nel centru de servicios, cola presencia de plaza d’abastos (1918), casinu (1918) o les magnífiques escueles diseñaes por Juan Miguel de la Guardia nel 1904. Otros elementos yá nun esisten, como l’economatu, comedor o cooperativa obrera, desapaecíos nel entamu del sieglu XXI.

Manuel Antonio Huerta Nuño

 

GALERÍA D'IMAXES