Bloques de Viviendes

Tresportes

Bloques de Viviendes

Estación de Fuso, Uviéu

La estación de Fuso yera un llugar d’importante actividá dientro de la rede del Ferrocarril Vasco Asturiano, yá qu’ellí enllazaba la llinia principal de San Esteban a Uxo y Coḷḷanzo col ramal d’accesu a Uviéu. La peculiar orografía, coles limitaciones d’espaciu impuestes por los contrafuertes caliares que bordien el calce d’El Nalón, dio forma a un allugamientu mui singular, con un triángulu de víes parcialmente en túnel y la estación nún de los sos vértices.

N’otru d’ellos, onde confluyíen la llinia de San Esteban cola vía de triángulu que daba accesu direutu hacia Coḷḷanzo y yera transitada polos trenes de carbón, establecióse una estación pa trenes de mercancíes. Como parte de les sos instalaciones, a lo último de la década del 1940, la empresa llevantó dos bloques de viviendes pa ferroviarios, dientro d’una importante campaña de renovación del llugar qu’incluyó otros elementos como la estación nueva o la desapaecida cabina d’enclavamientos.

Polo que respeuta a les viviendes, construyéronse por una fundición d’estañu establecida nel llugar y, más tarde, adquiríes pol Vasco Asturiano. Güei son propiedá de los sos inquilinos. Tán formaes por dos bloques rectangulares, asitiaos de forma perpendicular a les víes, dexando un pequeñu xardín entrambos edificios. Caún d’ellos presenta planta rectangular dividida en trés altures, con dos viviendes per pisu y cubierta de pabellón. El bloque que ta más más al oeste cuenta na planta baxa con un pasaxe que da entrada al xardín y dende él s’accede a les respeutives escaleres independientes que dan accesu a les viviendes.

La decoración ye escasa y céntrase nes soleres de les ventanes y na pintura que recubre’l revocáu de los murios.

Anque’l so orixe nun ye estrictamente ferroviariu, sí tuvieron venceyaes al ferrocarril na mayor parte de la so historia y formen un pequeñu pero interesante conxuntu nun llugar mui llamaderu.

Guillermo Bas Ordóñez

GALERÍA D'IMAXES