El primeru d’estos conxuntos, Xardín de Cantos, asítiase na redolada del recintu fabril, na so vertiente meridional. Intégralo una serie de xalés destinaos a inxenieros y cargos altos de la fábrica, incluyendo la vivienda del direutor. Dotaos d’espacios axardinaos, los xalés respuenden nel so trazáu a un plantegamientu urbanísticu cuidáu que, inspiráu nel modelu de ciudá xardín, ye obra del arquiteutu Enrique Rodríguez Bustelo. Fechaos ente’l 1948 y el 1964, de los trazaos fáense cargu, xunto a Rodríguez Bustelo, los arquiteutos Manuel Aymerich Amadiós y Tomás Menéndez Abascal. El conxuntu trata de conxugar les necesidaes específiques del programa arquiteutónicu cola adautación al entornu, obedeciendo en bona midida a los plantegamientos hixenistes que Manuel Aymerich aplica, coles mesmes, na Ciudad Residencial Tiempo Libre de Marbella (1956-1961). No que respeuta al tipu edificatoriu, anque en dalgunos casos, como’l xalé del direutor, sigue un modelu de vivienda unifamiliar con finca independiente, la mayor parte de los inmuebles axunten de dos a cuatro viviendes dotaes, eso sí, d’un espaciu axardináu.
La planificación del segundu nucleu d’actuación, La Maruca, ye del arquiteutu Tomás Menéndez Abascal. Los trabayos constructivos prollónguense ente los años 1951 y 1964. Compónenlu dellos bloques de viviendes, escueles, economatu y ilesia. Los bloques residenciales respuenden a modelos distintos d’ocupación y la so planificación da respuesta al númberu de miembros qu’integren les unidaes familiares –numberoses, ensin fíos, etc.–, lo que repercute na so superficie, programa, númberu de dependencies y accesos. Instrumentu de control espiritual y moral, la ilesia, proyeutada por Manuel Calvete, conviértese en pieza fundamental del programa d’equipamientos.
Natalia Tielve García
Comentaris recents