ENDASA

N’estableciendo una primer factoría n’El Playón de Raíces, la empresa plantega incrementar la so producción y busca un allugamientu nuevu, avanzada la década del 1950, nel marxe derechu de la ría d’Avilés: la marisma asitiada ente l’entrante de L’Estrellín y San Balandrán, saniada pa ello y na que se construyó un cai de serviciu. Les instalaciones nueves, con una superficie aproximada de 45 hectárees, centraron la so actividá na producción, la tresformación y la comercialización de aluminiu.

Dientro del conxuntu rescamplen les naves de fundición y d’electrólisis, proyeutaes pol inxenieru Carlos Fernández Casado y executaes pola empresa constructora HUARTE y CIA, S.A. Adscríbense a una de les etapes más productibles dientro de l’amplia producción del inxenieru la orientada hacia la prefabricación de naves industriales. No teunolóxico, podemos sorrayar l’emplegu innovador del formigón premoldiao –una de les más notables aportaciones de Fernández Casado– atendiendo a les sos ventayes constructives: versatilidá, facilidá de montaxe y desmontaxe, seguridá, resistencia y capacidá pa dar solución al problema de cobertoria de grandes lluces.

La nave de fundición, de dimensiones notables, planta rectangular y cubierta a dos agües, respuende a una marcada racionalidá. La estructura, de formigón premoldiao, organizada n’elementos tresversales, compónese de pilares que sostienen vigues de ponte-grúa y cerches cencielles encontaes isostáticamente sobre ellos.

Adoptando un allugamientu paralelu asítiense les dos naves d’electrólisis, con estructura de formigón armao y perfil d’arcu na cubierta. Na so redolada construyóse’l parque d’intemperie. El conxuntu resuélvese harmonizando claridá y cenciellez, resistencia y regularidá.

Natalia Tielve García