Cerámiques Guisasola

El conxuntu ta compuestu por dos partes bien diferenciaes, separtaes güei pola carretera. Per un llau ta l’edificiu d’oficines, que lleva la firma del arquiteutu Manuel del Busto. Esti inmueble confórmenlu dos edificios paralelos de planta rectangular, construyíos emplegando lladriyu visto y zones revocaes. Na fachada principal atopamos una torre cuadrangular ensin grandes vanos onde ta’l reló y el rótulu cerámicu col nome de la empresa, y que recuerda a otres construcciones llevantaes pol autor n’otres zones d’Asturies. Al so llau asítiase un balcón voláu metálicu prominente, teníu por elementos d’esi material, y al que s’accede per una arquería triple protexida por alar de madera superior. Tamién hai una segunda nave a la que s’accede per un gran arcu escarzanu, rematáu por un frontón mistillinial col cuerpu central en resalte.

A esi llau de la carretera asítiase una nave industrial de lladriyu na que rescampla la ordenación de los vanos, nes sos dos altures, separtaes por faxes, con una de les dos chimenees a los sos pies. La otra, en peores condiciones de conservación, ta na segunda parte del complexu, frente a les oficines. Inxértase nuna nave de grandes dimensiones y na so parte superior engalánase con diferentes aniellos superpuestos, tanto llisos como axedrezaos, y una socesión de recortes qu’arrodien la chimenea.

L’inmueble incluyóse nel Inventariu de Patrimoniu Históricu Industrial (IPHI) d’Asturies que, anque ensin validez xurídica, reconoz el gran valor d’estes instalaciones. Anguaño una parte reconvirtióse pa nuevos usos empresariales y clínicos, mientres que’l restu sigue sumíu nuna fonda degradación qu’amenaza la integridá de los edificios que conformen la fábrica.

Rubén Domínguez Rodríguez