Industries
La empresa Conservas Ortiz tien el so orixe nel añu 1891, momentu nel que la fundó Bernardo Ortiz de Zárate n’Ondarroa. Nos sos entamos dedicábase a la venta d’anchoa y bonitu del norte n’escabeche nes zones qu’atiesten con Castiella. Tres la muerte de Bernardo Ortiz fíxose cargu de la empresa la esposa, Petra López de Aréchaga, fechu que llevaría finalmente a la so constitución como sociedá anónima nel 1956.
Nos años trenta, con motivu de la espansión del negociu a lo llargo de la costa cantábrica, Conservas Ortiz instalóse na villa de Candás, onde la industria conservera yá arraigonare. Nesi sen hai que destacar que, al igual que n’otros trabayos venceyaos a la mar, el rellacionáu colas fábriques de conserves yera desempeñáu de manera mayoritaria por muyeres que teníen maríos o padres marineros.
Cola llegada a Asturies, la conservera levantó un edificiu llamaderu nuna céntrica plaza de la villa que se convertiría, finalmente, nel so más importante centru productivu. L’inmueble plantegóse como un volume perfeutamente simétricu, de marcada horizontalidá y adaptáu al desnivel del esterior. No que se refier al so desendolcu, ta formáu por un cuerpu baxu central arrodiáu por dos llaterales remataos por frontones mistilliniales, que-y dan mayor altura. L’accesu principal fórmalu una pequeña entrada adintelada sobre la que se coloca l’anagrama de la compañía, formáu poles lletres C y O. Nos mentaos frontones llaterales asitiáronse, al empar, representaciones en baxurrelieve d’una pareya de pexes sobre una socesión de foles, enmarcaes nun recorte rectangular.
Nel añu 2010 la fábrica sufrió, na so parte posterior, un grave esbarrumbu qu’aceleró los planes pa la so rehabilitación. Anguaño acueye un espaciu cultural d’esposición y salón d’actos, anque se prevé qu’en feches próximes pueda ser la sede del Ecomuséu de la Conserva d’Asturies.
Rubén Domínguez Rodríguez
GALERÍA D'IMAXES
Comentaris recents