Industries
La Curtidora Maribona llevantóse ente los años 1901 y 1902 pola Sociedad Avilés Industrial, rexentada polos hermanos José y Francisco Rodríguez Maribona. Indianos retornaos de Cuba, impulsaron empreses como la Compañía del Tranvía Eléctrico de Avilés, la Banca Maribona o las azucreres de Veriña y Villalegre.
Les instalaciones de la Curtidora Avilés Industrial tuvieron dedicaes dende la so entrada en funcionamientu, nel 1903, al procesu productivu de curtidura, basáu na utilización del cromu. El conxuntu arquiteutónicu ta constituyíu por trés naves de planta rectangular, ente les que sobresal la central no que respeuta a dimensiones y tratamientu. Ye pa rescamplar de forma especia’l xuegu cromáticu qu’introduz l’espiece de doveles de lladriyu collorao alternando con piedra, que de forma repetida introduzse nos vanos y los ángulos del complexu.
Cola quiebra de la Banca Maribona entamó la decadencia de l’actividá fabril. Tres años d’inactividá’l Conceyu d’Avilés adquirió les instalaciones na década del 1980. Siguiendo’l proyeutu que, nel 1989, ellaboraba l’equipu d’arquiteutos integráu por Fernando Nanclares, Nieves Ruíz, Jesús Menéndez y Juan González Moriyón, el conxuntu foi oxetu d’una rehabilitación y acondicionamientu como viveru d’empreses.
Afaraes por mor d’una quema les cubiertes y l’interior del edificiu, malapenes pudieron conservase dalgunos elementos estructurales y les muries perimetrales, con especial incidencia na carga escenográfica de la so fachada principal. La estructura del conxuntu reforzóse, introdúxose una reforma de la cubierta aprovechando parte de l’armadura de cubrición esistente, y remodeláronse los espacios interiores conforme coles necesidaes derivaes de los usos nuevos. Nel edificiu central diseñóse un corredor nes plantes altes, con lluz y ventilación cenital, concebíu como espaciu de rellación y de distribución. Una vegada finaes les obres de rehabilitación, nel añu 1995, La Curtidora comenzaba a funcionar como centru d’empreses.
GALERÍA D'IMAXES
Comentaris recents