Iniciábase asina la construcción d’un complexu de naves y bateríes de fornos que, en parte, aprovechaba les instalaciones de l’antigua fábrica de Cerámica Asturiana, allugada nel mesmu sitiu. Un grupu de talleres, almacenes de materies primes, carpintería, comedor y viviendes pa obreros completábenlu. Orientando la so producción hacia la lloza feldespático, inspirao na lloza inglés, la factoría dótase con instalaciones modernes, como dos fornos de bizcuechu y otros dos de barniz, fornos de botella alimentaos con carbón que llegaron a tener una capacidá pa 100.000 pieces.
Tres dellos años de problemes económicos, cese de l’actividá y disolución de la empresa, nel 1922 quedaba constituyida la nueva sociedá Fábrica de Loza de San Claudio SA. Entamaba asina una etapa de prosperidá y de meyores nes instalaciones que permitieron a la firma conquistar el lideralgu nacional na producción de cacíes de calidá. Una vegada superada la crisis que la sociedá traviesa nos años de la Guerra Civil y la inmediata posguerra, la década del 1950 inaugura un periodu espansivu y de modernización. Instálense entós los fornos de gas Kerabedarf, de procedencia alemana, y un gasóxenu. La firma llogra caltenese con solvencia hasta los ochenta, entamando una decadencia agónica a la que pon fin el cese definitivu de l’actividá nel 2009.
Con too, el que fore’l primer Bien d’Interés Cultural de calter industrial declaráu n’Asturies –anulada nel 2012– tien falta anguaño de proteición patrimonial efeutiva y el so estáu d’abandonu ye cuando menos esmoleciente.
Natalia Tielve García
Comentaris recents