Ye'l casu de los dos conxuntos de viviendes destinaos a los trabayadores de la central térmica de Soto Ribera, asitiaos en La Ribera y Soto Rei; el primeru d'ellos concebíu p'agospiar a los emplegaos y les sos families, mientres que nel segundu tán los llugares destinaos a los obreros.
El pobláu de Soto Rei proyéutase y execútase en delles fases a partir del añu 1961 introduciendo una diversidá tipolóxica: un total de ciento venti agospios combinen la edificación multifamiliar y les residencies unifamiliares apegaes. El diseñu de los bloques presenta un paralelismu induldable col pobláu de La Hermida, en Cantabria, del mesmu arquiteutu, no que se refier a la organización rítmica de les viviendes y la configuración de los alzaos. Nes construcciones enfatízase la fuercia espresiva de los materiales y la virtualidá plástica del color.
Pela so parte, el pobláu de La Ribera axunta ventiocho residencies destinaes a emplegaos de la central. Tanto nel so diseñu como na so execución acométense en cuatro fases ente los años 1962 y 1968. Nesti casu l'arquiteutu Álvarez Castelao opta por una tipoloxía única, agrupando les construcciones de cuatro en cuatro. La edificación concéntrase na zona perimetral, dexando un espaciu axardináu y de xuegos nel interior de la finca. Hai, amás, zones de transición qu’estremen lo privao de lo público. Les agrupaciones allíniense en dos fileres perpendiculares, protexendo del aire la zona de xardinos. La teunoloxía constructiva, percenciella, básase nel emplegu d'estructura de formigón, revocada en gris, xenerando un entramáu reticular nes fachaes, y incorporando carpinteríes de madera. Especialmente interesante y recurrente, per otra parte, nos diseños de Castelao ye la solución adoptada pa la cubierta, con techu a dos agües inclinaes hacia dientro bordiaes por un cubremurios finu.
Natalia Tielve García
Comentaris recents