Ponte de Ricastro

Tresportes

Ponte de Ricastro

Uxo-Figareo, Mieres

Pozo Santa Bárbara

371954628

Pozu Santa Bárbara

373211437

Fábrica de Mieres

522829745

Llocomotora HT 110

375471882

Ponte de Ricastro

Una carauterística de les esplotaciones mineres de la Sociedad Hulleras del Turón, determinada pola situación de les sos concesiones y la xeografía del valle, foi que les sos instalaciones de llaváu s’asitiaron a cierta distancia del ríu Caudal.

Pa dar salida a la so producción foi necesario construyir un ferrocarril de vía ancha d’unos tres quilómetros de llargor dende l’empalme cola llinia Lleón-Xixón nel apartaderu de Ricastro hasta’l llavaderu de carbones de La Cuadriella.

Magar el so llargor, el so percorríu yera abondosu n’obres de fábrica, sobre manera murios de sostenimientu y pontes. El más importante d’ellos, con una lluz de 60 metros, yera’l destináu a cruciar el ríu Caudal nes cercaníes de Ricastro.

Construyíu pa vía única, ta formáu por una viga de celosía Linville apoyada n’estribos de sillería. Presenta la peculiaridá de que’l so tableru s’asitia aproximadamente a la metá de l’altura de los cuchiellos, cuando xeneralmente se llocaliza na zona inferior o superior d’éstos. Instalóse nel 1893 por Fábrica de Mieres y podemos atribuyir el so diseñu al inxenieru Jerónimo Ibrán.

Dio serviciu cuasi un sieglu, hasta la clausura definitiva de la llinia nel 1990. Unos años enantes, con motivu de les obres de construcción de la carretera nacional nueva, la so rasante hebo ser modificada pa ganar altor, polo que la so estructura suplementóse con unas vigues verticales colocaes sobre los estribos.

Yá fuera de serviciu, utilizóse como pasu peonil, lo que requirió la so restauración dafechu, cuando se pintó col color gris claro que presenta güei. Con motivu d’esa intervención eliminóse una pasarela añadida nel costáu sur.

Son dellos los valores patrimoniales que s’axunten nél. Per una parte, ye ún de los elementos más distintivos de la rede ferroviaria d’Hulleras del Turón y tamién visible por tar nun puntu de munchu tránsitu. En segundu llugar, presenta una estructura mui orixinal qu’amás ye una magnífica amuesa de la inxeniería llocal qu’entamó a desendolcase nos años últimos del sieglu XIX, con Fábrica de Mieres como una de les constructoras de pontes más notables del panorama español.

Guillermo Bas Ordóñez

 

GALERÍA D'IMAXES