Minería
Les concesiones del antiguu conceyu de Tudela, integráu nel d’Uviéu nel 1857, esplotáronse dende, polo menos, el sieglu XIX, cuando la fiebre de demarcaciones mineres llegó a esti sector de la Cuenca Hullera Central de la mano de compañíes como l’Anglo Asturiana. Dos zones centrarán equí la esplotación de la hulla: el cotu de Lluniego, la que más desendolcu algamaría y onde s’afondaría el Pozu San José; y el cotu de Tudela, onde s’inscribe l’allugamientu que nos ocupa, asitiáu nuna vallina que s’abre al Nalón frente a la población de Veguín.
La segunda metá del sieglu XIX ve asocedese distintes empreses na propiedá y nel réxime d’esplotación de distintes mines nesti sector, que, a lo primeros del sieglu XX, intégrense na Compañía General Minera, domiciliada en París. Finada la primer década del sieglu, les concesiones pasarán a manes d’Hulleras de Veguín que, nel 1918 xuniráse a Carboneras de Olloniego, naciendo Hulleras de Veguín y Olloniego. Nun será’l cambiu de propiedá últimu, yá que, llueu de la Guerra Civil, la mina de Veguín venderáse a la cementera de Veguín –aicionista d’Hulleras dende la so creación–, que la trespasará nel 1962 a una compañía nueva: Hulleras de San Julián del Box. Esta sociedá heredó unes instalaciones y maquinaria obsoletes, pero tampoco fixo grandes inversiones, sacante l’aprovechamientu de menudos nel llavaderu, pesllando definitivamente cuatro años más tarde y llegando a comunicar el llabor col Pozu Olloniego.
Dos construcciones rescamplen entovía güei: el castillete y la chimenea. El castillete, que sirve a ún de los pozos verticales más tempranos d’Asturies, ye tamién el de mayor tamañu de los rexistraos na nuesa provincia na categoría de castilletes de fábrica de piedra o, nesti casu, fábrica mesta de piedra y lladriyu. La chimenea, onde se llee la fecha del 1903, y que nos años sesenta yá nun tenía función, ye otra estructura imponente, nacida nesti casu pa forciar la ventilación del llabor de monte per aciu d’un llar asitáu nuna cota más baxa, cercanu al castillete. Zarra’l conxuntu una pequeña subestación eléctrica anguaño arruinada dafechu.
GALERÍA D'IMAXES
Comentaris recents