Minería
Dende la so creación, la empresa Duro y Compañía especializóse na fabricación de fierros na so planta de La Felguera, pero la escasez del carbón y la incapacidá de les empreses esistentes p’asegura-y una producción constante del mineral aconseyaron la esplotación direuta de dalgunes mines per parte de la siderúrxica llangreana práuticamente dende los sos entamos.
Dos foron los cotos escoyíos: la famosa Nalona, que llueu daría pasu al Pozu Fondón, y Etelvinas, nel valle de Carrocera. Nesta concesión la compañía hebo d’empezar mui temprano, a lo primero de la década del 1860, produciendo grandes cambios na estructura de les precaries esplotaciones esistentes: abriríense mines nueves, planos inclinaos, grandes ventiladores, ramales mineros con raíles de fierro y, a lo último del sieglu, el ferrocarril.
N’avientu del 1953 la Duro entamaría a afondar un pozu en La Güeria que-y serviría pa organizar meyor los trabayos mineros y beneficiar zones de la concesión que nun yera posible facer dende’l cercanu Pozu Sotón. Será l’últimu pozu realizáu pola Duro, nun contestu carauterizáu polos creitos hispanoamericanos, que financiaríen bona parte de les obres, y pol fin de l’autarquía.
La Duro aplicaría equí tol saber acumuláu en minería per un sieglu, montando un pozu con novedaes interesantes, por exemplu na xestión mecánica de la plaza minera. Nel Pozu Venturo tolos servicios taben nun únicu volume, dende les oficines alministrativas y téuniques a la casa d’aséu o la de máquines, prestando atención especial al diseñu del edificiu. N’efeutu, el proyeutu firmáu pol arquiteutu Fernández Castañón nel 1956, ye fondamente curiáu y innovador, pudiendo inscribise dientro d’un racionalismu eclécticu. Los esteriores también se cuidaron al detalle con ‘parterres’ axardinaos, fontes col emblema de la Duro, grandes exemplares de coníferes y sebe viva pa dixebrar les distintes árees.
Nel 1967 el Pozu Venturo integraríase, como’l restu de la seición de mines de la Duro, na empresa hullera estatal HUNOSA, que lu caltendría n’actividá hasta’l 1990, cuando peslló les sos puertes de manera definitiva.
GALERÍA D'IMAXES
Comentaris recents