Industries
Tres la independencia de les colonies españoles a lo llargo del sieglu XIX y, finalmente, la perda de Cuba nel 1898, la importación de dalgunos productos como azucre y tabacu viose interrumpida. Por esi motivu promovióse la so producción llocal, nel casu asturianu, en zones rurales.
Asina, a partir de la década de los años 1960, la firma holandesa Mont-Tabac entamó a facer los primeros estudios sobre la viabilidá de la producción de tabacu na vega de Llaniu, en Salas.
Consecuencia del iniciu d’esta actividá ye la construcción de dellos secaderos de tabacu que taríen en funcionamientu hasta’l fin de los cultivos nel 1993 y que, dende los años setenta, na mesma década en que pasaron a depender de Tabacalera Española, suministraron a la fábrica de tabacos de Xixón. El destín principal del tabacu yera la fabricación de capes de puru.
Esta tipoloxía constructiva, dedicada al secáu de les fueyes de tabacu, estendió peles vegues de Salas y Balmonte. Rescampla’l de Llaniu, un edificio de planta rectangular y de gran cenciellez, nel que s’emplega como material constructivu el lladriyu visto, ensin demasiada preocupación pol acabáu final. Al esterior les paredes llaterales tán percorríes por contrafuertes del mesmu material, mientres que nel interior estos elementos son de formigón armao, con un espesor qu’aumenta conforme s’averen al suelu. La cubierta ta formada por vigues de cuchiellu español de madera y recubierta por plaques metáliques, tando percorrida llonxitudinalmente por un cuerpu eleváu que tien el fin de favorecer la entrada de lluz natural al interior y, al empar, ameyorar la ventilación y el secáu de les fueyes.
Tres el cese del so usu orixinal nel 1993, les instalaciones reutilizáronse como llugar d’almacenaxe de preseos y maquinaria agrícola, tando nun bon estáu de conservación.
Rubén Domínguez Rodríguez
GALERÍA D'IMAXES
Comentaris recents