Tolves de Carbón

Pocos años más tarde, nel 1903, entama la so actividá la fábrica de cementu Portland y cal hidráulico de la sociedá M.C. Butsems y Fradera, allugada en Garraf (Barcelona), próxima a la llinia de ferrocarril de Valls y Vilanova a Barcelona, na que contaba con apeaderu propiu. Los sos fornos de cocimientu continuu yeren capaces a producir 100 tonelaes diaries, producción que s’almacenaba nos sos silos de 3.000 tonelaes.

P’asegurar el suministru de combustible de la so factoría Cementos Fradera adquier na década del 1920 un grupu de concesiones mineres nel conceyu de Llaviana al empresariu llocal Cándido Blanco Varela. La cementera contaba con grupos d’esplotación na capital y nes poblaciones de Tolivia y Ribota. Estos grupos quedaron auníos por un tranvía conocíu pol nome de la so llocomotora, ‘La Campurra’. 

La producción treslladábase a un espaciu cerca de la estación del Ferrocarril de Langreo, na redolada de Llaviana, onde yera almacenada temporalmente nunos silos, a la espera del so tresporte al puertu de Xixón. Ye una gran estructura compuesta por catorce contenedores cilíndricos de formigón armao formando un conxuntu con cubierta común y apoyada en pilastres del mesmu material. La carga fadríase pela parte superior per aciu d’un sistema de cable ensin fin, y la descarga pela inferior, col basculáu sobre los vagones que circulaben per una vía auxiliar que coneutaba cola xeneral del Ferrocarril de Langreo. 

Una solución pal almacenamientu de carbón tan poco habitual n’Asturies convierte a les Tolves de Fradera nun elementu patrimonial de gran valor. Esa peculiaridá esplícase pola empresa que les promovió; nun hai qu’escaecer que se trata d’una tipoloxía propia de les fábriques de cementu qu’evolucionó dende les primeres estructures de planta cuadrada pa ser sustituyíes, pocu tiempu depués, polos contenedores cilíndricos. 

Mónica García Cuetos