Industries
La torre refrixerante de la vieya fábrica de la Sociedad Metalúrgica Duro Felguera, construyida na década del 1950, ye una de les estructures que, tres el cese de l’actividá de la planta a mediaos de los años ochenta, sobrevivieron a la piqueta. Alzada sobre una serie de pilares y vigues que teníen la cuba pa l’agua –cuando taba en funcionamientu–, la estructura troncocónica del refrixerante, de formigón armao y percorrida por acanaladures, elévase hasta algamar una altura de cuarenta y cinco metros.
Entamaos los noventa plantégase la so rehabilitación p’acoyer oficines del INEM y habilítase nel so interior un espaciu de planta circular organizáu en trés altures –suétanu, planta y pisu– que, por mor de ciertes dificultaes téuniques, nun llegó a funcionar como tal equipamientu. Sicasí, esta rehabilitación foi’l puntu de partida d’un proyeutu nuevu, esta vegada sí, culmináu: el que llevó al acondicionamientu de la torre de refrixeración, siguiendo’l proyeutu del arquiteutu Claudio Ignacio Pedrero, como centru de receición de visitantes del Muséu de la Siderurxa (MUSI). La dotación nueva quedaba inaugurada de manera oficial en setiembre del 2006.
El refrixerante incorpora, como solución de cubierta, una cúpula d’aceru y cristal que, a mou de llucernariu, aporta illuminación cenital. El revestimientu d’aceru galvanizao de los murios realza amás el so calter industrial. L’espaciu xeneráu ta acordies con un percorríu espositivu qu’esplica la historia empresarial de la Duro y el papel fundamental que la empresa tomó nel procesu industrializador asturianu.
Remata la monumental estructura una intervención cromática, a cargu de Marcelino de la Fuente que, más allá del so interés plásticu, llogra un marcáu simbolismu, tresformando’l refrixerante nun imponente faru que visibiliza y enfatiza l’interés patrimonial del allugamientu. Completa la intervención la obra que l’artista fai nel esterior del conxuntu, con pintures realizaes sobre’l muriu y nel pavimentu qu’aluden a la fuercia, la enerxía y la potencia de la industria.
GALERÍA D'IMAXES
Comentaris recents