Tresportes
La construcción del primer tramu de la llinia de vía ancha de Lleón a Xixón en suelu asturianu foi una obra d’envergadura qu’aunió’l puertu xixonés con La Pola Ḷḷena. En 62 quilómetros de percorríu acumulábase un bon númberu d’obres de fábrica, ente elles una docena de túneles y numberosos pontes y viaductos, dalgunos d’estructura metálica y otros de piedra.
Dientro d’estos últimos, el de mayor tamañu yera’l viaductu de Serín, asitiáu nes cercaníes de la estación del mesmu nome y construyíu pa salvar la fondigonada del regatu Santianes. La so estructura taba formada por una socesión de 11 arcos de mediu puntu de 13,4 metros de lluz, lo que sumaba un llargor total de 178,5 metros. Executóse en sillería rústica con un acabáu mui sobriu, yá que nun presenta práuticamente nengún tipu de decoración sacante unes cencielles impostes nel arranque de los arcos. La so estética yera mui asemeyada al d’otres obres similares, como los viaductos de Les Segaes o Muñón.
Construyóse pa vía única y finóse nel 1873, un añu enantes de la inauguración del ferrocarril. Dio serviciu per dalgo más d’un sieglu hasta que, nel 1979, abandonóse cola duplicación de vía ente Villabona y Veriña, como parte del procesu de puesta de la doble vía dende esta última estación a La Pola Ḷḷena. Esa obra esixó la construcción de una variante con un viaductu nuevu de formigón, asitiáu unos metros al oeste. La estructura orixinada nun se valtó, sinón que simplemente quedó abandonada.
Depués de munchos años, nel 2010 el viaductu de Serín rehabilitóse como pasarela peonil. Con motivu d’esta obra instaláronse unos arcos d’aceru galvanizao parcialmente cubiertos por gayos d’aceru corten y zarraos por una estructura de maya metálico.
Ye una obra d’un gran traza y fuercia visual que constitúi ún de los meyores testimonios de los entamos de la rede de vía ancha n’Asturies, oxetu d’una intervención reciente que permitió la so recuperación integrando un proyeutu d’arquiteutura contemporánea.
GALERÍA D'IMAXES
Comentaris recents