Quién somos – Historia del Proyeutu

 
¿Cómo nació? El primer elementu industrial qu’alimentó la nuesa imaxinación foron eses llocomotores a vapor que’l cine averó a les nueses vides pa enseñanos la fuercia del binomiu imaxe-industria. Tiempu y dellos rodaxes depués en zones industriales europees diferentes confirmaron la nuesa intuición sobre la singularidá del Patrimoniu Industrial asturianu y la necesidá de construyir un retratu propiu. Ensin señardaes nin llamentos, sinón enfocaos nun llegáu que, tres dos sieglos d’industrialización y tresformación del territoriu y les sos xentes, nos fala del presente pa interroganos sobre’l futuru.
¿Cómo facelo? De la meyor manera que sabemos: dende una perspeutiva descaradamente audiovisual p’adientranos en caún de los espacios patrimoniales y sentilos de nueso, con un plantegamientu artísticu distintivu combináu col saber de los historiadores. En total, más de venti profesionales del cine, la televisión, la investigación histórica, la fotografía, el soníu, el diseñu y la teunoloxía.
¿Cómo lo financiamos? Atopar los recursos necesarios nunca ye fácil pero, sinceramente, préstennos los retos. Esta vegada inclusive complicámoslo too un poco más, enfotaos en construyir un proyeutu vertebrador que contara col compromisu de cuantos más meyor. El sofitu del Ministeriu de Cultura y el Gobiernu d’Asturies foron determinantes, asina que decidimos plantegar un ‘crowdfunding empresarial’ ensin dexar de picar a les puertes de los conceyos porque si’l patrimoniu ye de toos, tamién ye xera de toos la so divulgación.
¿Actualizamos los conteníos? Patrimoniuindustrial.com necesitó cuasi dos años pa materializase y tien tola vida per delantre pa siguir medrando. La inmensidá del patrimoniu industrial asturianu facilítanos la espublización regular de pieces audiovisuales nueves sobre más allugamientos, fitos industriales, testos d’historiadores, seiciones nueves, testimonios de trabayadores, etc.
¿Quién ye Freews? Freews ye una productora de cine independiente asitiada en Xixón que fundó Marta F. Crestelo y Marcos M. Merino nel 2014 pa producir les sos propies películes de non ficción. Freews produxo dende entós dos llargumetraxes, dos curtiumetraxes, dos series de non ficción y esti monumental rellatu online sobre’l patrimoniu industrial.