Central de Miranda

Vaquero Palacios intervién en Miranda al traviés de la ordenación de los volúmenes esteriores y del acondicionamientu interior. El trabayu concéntrase, nel esterior, nes dos chimenees de ventilación qu’arrodien la boca d’entrada a les instalaciones. Ellevaes a un altor de trece metros, incorporen nos sos frentes refundíos de formigón baxurrelieves que reproducen dos figures alegóriques, Prometeo y Atlas, condensando’l calor y la lluz, nel primer casu, y la fuercia y el movimientu, nel segundu; esto ye, cuatro de les aplicaciones fundamentales de l’enerxía llétrica. A mou de monumentales pilones, proporcionen una solemnidá singular a la entrada a la central. Sobre’l dintel de la puerta d’accesu asítiase un elementu plásticu singular, fechu en fierro y cobre, que recrea un campu magnéticu.

Nel interior, al traviés d’una utilización estudiada de la lluz artificial y del color, consíguese amenorgar la sensación, d’otru mou opresiva, de soterramientu, cualificar estéticamente l’espaciu y dignificar l’ámbitu de trabayu. Los paramentos preséntense revistíos con una chapa metálica plegada qu’incorpora una policromía atrevío, dando preferencia a los tonos cálidos. El color estiéndese a elementos como les barandes, les canalizaciones y la maquinaria, apangando l’aspeutu fríu y llaberínticu de los soterraños. A mou d’ilusión, un artificiu inxeniosu ye introducíu, de forma qu’unes falses ventanes, illuminaes de manera artificial, xeneren una sensación d’espacialidá.

Natalia Tielve García