Central de Soto

Cola intervención del inxenieru Carlos Fernández Casado –autor del banzáu y del pontón– y del arquiteutu Ignacio Álvarez Castelao –responsable del diseñu de los poblaos de viviendes de Soto Rei y de La Ribera– conviértese nun de los conxuntos más reseñables de l’arquiteutura del Movimientu Modernu n’Asturies.

Debémos-y a Carlos Fernández Casado’l proyeutu de la presa de derivación y del pontón que dan accesu a la central, fechaos nos años 1960 y 1961. Asitiaos agües abaxo de la confluencia de los ríos Nalón y Caudal, respuenden a la innovadora teunoloxía del pretensao. No que se refier a les instalaciones productives, la central cuenta con trés unidaes xeneradores, Soto I (1962) Soto II (1967) y Soto III (1984), trés grupos monobloque, con funcionamientu independiente ente sí. La sala de máquines configúrase como un bloque unitariu de volúmenes nidios, sobriu y elemental na so composición, con acristalamientos amplios.

L’arquiteutu Ignacio Álvarez Castelao, pela so parte, proyeuta dos conxuntos de viviendes destinaes a los emplegaos y trabayadores de la central, asitiaos en La Ribera y Soto Rei. Nel primer casu, atopamos un grupo residencial de racional y cuidada austeridá, que respuende a una tipoloxía única de morada. Les ventiocho viviendes que lu integren, agrupaes de cuatro en cuatro, proyeutáronse y construyéronse en cuatro fases, ente los años 1962 y 1968. El pobláu de Soto Rei, planificáu a partir del 1961 y executáu en fases diverses, ta compuestu por cientu venti unidaes, onde se combina tipoloxíes diferentes, con viviendes unifamiliares arreyaes en filera, bloques llonxitudinales y bloques xiraos y agrupaos, estableciendo amás una diferenciación no que se refier a procedimientos constructivos, altures y valores cromáticos.

Natalia Tielve García