Central de Tañes

Trátase d’una central de calter soterrañu, escavada en roca y de tipu reversible, qu’aprovecha l’agua de un banzáu superior, el de Tañes, y otru inferior, el de Rusecu, nel cursu altu del ríu Nalón. En dambos casos son preses de gravedá.

Los trabayos d’integración entamaos na central por parte de Joaquín Vaquero Palacios y del so fíu Joaquín Vaquero Turcios fáense nel 1980, tando concentraos nel interior. L’afloramientu rocosu conforma los paramentos de la central, realzaos de manera intencionada n’atención al so potencial estéticu. Los paneles de roca preséntense enmarcaos por planches d’aceru inoxidable, que sirven como revistimientu de los pilares de formigón que soporten la carrera de la ponte grúa. Acullá del so induldable impautu estéticu, simbólicamente, el xuegu de materiales, roca y aceru pue considerase una alusión al diálogu entre la naturaleza y la industria, la historia y el presente.

La sensación claustrofóbica de tar baxo tierra vese amenorgada recurriendo al artificiu de la lluz y del color. Resulta particularmente suxeridor l’actuación fecha na bóveda, reforciada con formigón y ensin nervatures, ellevada a dieciséis metros d’altor y prollongada a lo llargo de más de cincuenta metros. La sensación de pesadez de la mesma desfaise acudiendo a la policromía: un llabor pictóricu esquemáticu, de colores planos que, sobre un fondu gris azuláu escuru, combina’l blancu y el mariellu. Les formes, qu’aparenten flotar nel vacíu, a mou de nubes xeométriques recortaes nel cielu, recreen un celaxe inmensu. Completen el diseñu otros detalles, como los ceniceros allugaos en dellos güecos de la obra, los paneles divisorios de chapla grecao que separten les estancies auxiliares y dos cuidaos baxorrelieves.

Natalia Tielve García