ENSIDESA

Industries

Conxuntu Industrial d'ENSIDESA

Avilés - Corvera - Gozón

El conxuntu históricu industrial d’ENSIDESA (Empresa Nacional Siderúrgica, S.A.) constitúi ún de los más notables esponentes del Patrimoniu Industrial n’España. Surdida dientro del Instituto Nacional de Industria per decretu de la Presidencia del Gobiernu del 15 de xunu del 1950, ENSIDESA foi la primer siderurxa integral del país. El so oxetivu nun foi otru que’l de suministrar d’aceru a la nación, atendiendo la demanda interna de consumu, hasta entós dependiente del mercáu priváu.

La planta ocupó’l fondu de la ría avilesina, habilitándose’l muelle siderúrxicu na dársena d’Agustín. Les obres constructives del estensu complexu fabril –bateríes de coque, fornos altos, acería, talleres de tresformación, central térmica…– entamáronse nel 1952. La producción principió’l 24 de setiembre del 1957 col prendíu del primer fornu altu, Carmen. Ente los sos elementos más destacables podemos señalar un grupu d’instalaciones con diseñu del inxenieru Carlos Fernández Casado, que constitúin dalgunos de los primeros exemplos del emplegu del formigón prefabricao n’España. Trátase de los Talleres de Llaminación, Fundición, Mecánicu y de Calderería, xunto col Depósitu de Llocomotores, planificaos y construyíos ente’l 1952 y el 1959.

L’establecimientu de la factoría traxo una modificación fonda de les condiciones naturales y de les estructures territoriales, asina como un esplosivu crecimientu espacial de la ciudá d’Avilés como consecuencia de la llegada de miles de trabayadores inmigraos. Obedeciendo a un esquema paternalista renováu, la empresa promovió la construcción de conxuntos residenciales con destín a los sos trabayadores, ente los que destaca’l pobláu de Llaranes.

Les reestructuraciones socesives feches a consecuencia de la reconversión siderúrxica llevaron a la privatización de les instalaciones más rentables –anguaño en manes del Grupo ArcelorMittal– y al desarrollu del PEPA, Parque Empresarial Principáu d’Asturies, mientres qu’una parte significativa de los restos históricos de la planta, como los Fornos Altos o la Central Térmica, magar los sos reconocíos valores arquiteutónicos y teunolóxicos, foron llamentablemente esmantelaos.

Natalia Tielve García

Tallere de Laminación en Caliente de ENSIDESA. Patrimonio Industrial de Asturias

Talleres de Llaminación

Taller de Fundición de ENSIDESA. Patrimonio Industrial de Asturias

Talleres de Fundición

Depósitu de Llocomotores