Fábrica d’Armes

Con anterioridá a esta fecha la discontinua producción fundóse nel trabayu desendolcáu, baxo la direición del Cuerpu d’Artillería, por maestros armeros nos sos domicilios. Los trabayadores entregaben les pieces fabricaes pal so esame y prueba na Casa-Fábrica asitiada nel Palaciu del Duque del Parque –Palaciu del Marqués de San Feliz– nel que se llocalizaben los almacenes de materies primes y de productu termináu, oficines y sala de reconocimientu. La decisión de centralizar los llabores productivos nuna única instalación industrial determinó l’allugamientu de la factoría nel que, hasta la seronda del 2012, foi’l so asentamientu definitivu.

Ocupando una superficie llixeramente superior a los 120.000 metros cuadraos na qu’asitien, trazaos de manera cuidadosa, viales y arboláu, na fábrica acomódase un conxuntu d’edificios llevantaos a llargo de la segunda metá del sieglu XIX y hasta bien avanzada la centuria pasada. Combínense nellos diferentes estructures y soluciones constructives qu’ilustren la evolución teunolóxica y productiva esperimentada pel complexu a lo llargo de la so historia asina como les socesives remodelaciones y tresformaciones feches.

La entrada a la planta ye al traviés d’un edificiu abaluartáu con coronamientu d’almenes, de porte militar, qu’agospiaba los servicios alministrativos. A partir d’ésti asítiase una amplia cai central, colos talleres principales a los llaos, a la qu’aflúin aveníes tresversales. Los inmuebles más recientes daten d’entamos de la década de los 40 y ente ellos sobresal el Taller de Cañones, proyeutáu pol inxenieru Ildefonso Sánchez del Río.

No que cinca a la vertiente social, la fábrica nun promovió espacios de vivienda pa los sos operarios hasta entráu’l sieglu XX, contando namái con pabellones pa la xefatura. Nel 1921 la cooperativa de Maestros Armeros promovía, al amparu de la Llei de Cases Barates, la Colonia de San Feliz, proyeutada pol arquiteutu Julio Galán Carvajal, a la que siguieron otres promociones posteriores.

Natalia Tielve García