Pozu Fondón

Minería

Pozu Fondón

Sama, Llangréu

372406010

Bocamina La Nalona

376174198

Archivu Históricu

371690282

Pozu Fondón

El Pozu Fondón naz sobre les instalaciones mineres del monte de La Nalona, ún de los centros d’esplotación más antiguos del valle del Nalón y que yá conociera dél esplendor na primer metá del sieglu XIX al traviés de les manes d’Alejandro Aguado, Marqués de Las Marismas y ún de los personaxes más carismáticos del procesu industrializador asturianu. Sicasí, será cola Duro cuando La Nalona algame tol so esplendor mineru, llegando a convertise nun gran pozu vertical.

La Nalona yera, xunto coles Minas Etelvinas del valle de La Güeria Carrocera, nel conceyu vecín de Samartín del Rei Aurelio, los dos únicos focos d’esplotación minera que la Duro beneficiaría direutamente hasta’l principiu del sieglu XX, cuando la empresa entama delles tresformaciones que la llevarán a convertise na primera firma hullera del país. Poro, La Nalona yera yá ún de los llugares simbólicos de la Duro y será ehí onde decida afondar el so primer pozu vertical de carbón al que aína siguiría’l Sotón, Mosquitera y munchos más.

Los edificios que componen el Pozu Fondón daten d’una amplia forquía temporal que va ente l’afondamientu, como la casa de máquines del 1915, y los pabellones de casa d’aséu, llampistería, oficines…, de los años cuarenta. Sicasí la homoxeneidá estilística rescampla: construyíos con lladriyu, la piedra apaez nos basamentos, pilastres, llinies d’imposta, vanos en xeneral o nes diferentes moldures…, definiendo un modelu al que la compañía tornaría en más ocasiones. L’embarque reformóse nos años cincuenta, contando con interesantes murales.

La historia del pozu ye una de les más riques de la hulla: dende'l supuestu afayu d’un dinosauriu a la so completa inundación p’apagar una quema terrible; d’una colonia penitenciaria na que los vencíos de la Guerra Civil penaron la so derrota arrincando’l carbón de los vencedores, a ser el reposu de las cenices de D. José Manuel Fernández Felgueroso, presidente d’HUNOSA; del valtu d’un castillete pola empresa a la ubicación del archivu históricu de la compañía… Una complexa historia la del primer pozu de la daquella poderosa Duro Felguera.

Faustino Suárez Antuña

GALERÍA D'IMÁXENES