La empresa química Solvay, dientro del so plan d’espansión internacional, plantega al entamar el sieglu XX una fábrica en Torrelavega. P’atender les sos necesidaes enerxétiques compra unos cotos hulleros n’Asturies, en Lieres, onde desarrollará un espaciu de producción modélicu, desendolcando, amás, una intensa política social d’empresa.
La riqueza hullera de Lieres yera beneficiada dende muncho enantes que la empresa belga Solvay se fixera con estos cotos nel 1903. Yá a últimos del sieglu XVIII Xovellanos visitaba la Compañía de San Luis, qu’operaba nesta área y d’onde, en realidá, nun llevaría precisamente una impresión bona por suponer a esta compañía mayor intensidá y capitalización...
Solvay alquier les mines de Lieres a una compañía llocal pero correuta y organizada, La Fraternidad, p’asegurar l’abastecimientu d’hulla na fábrica química que construyía en Torrelavega, qu’entraría en funcionamientu nel 1905. Sicasí, l’impulsu definitivu nun llegaría hasta l’afondamientu del primer pozu vertical nel 1917. A ésti sumaríase otru pozu más, un llavaderu de carbones con entrada d’un ramal de los ferrocarriles d’Económicos que lu llevaríen hasta la so planta torrelaveguense, una central llétrica…
L’espaciu de producción de Solvay en Lieres organizábase en dos grandes esplanaes: una superior, onde taba la mina y les so dependencies más públiques; y otra inferior, destinada al llaváu, el despachu de los carbones y la preparación de la madera. Una ordenación modélica que se completaba con unes cuidaes instalaciones, tanto nes oficines, casa d’aséu, economatu…, como na propia báscula de ferrocarril de la plaza inferior. La maquinaria, cuidada y moderna, como los sistemes de pesáu, la central llétrica, el ventilador Aerex, la gasolinera, los magníficos y tempranos compresores Ingersoll, o, sobre manera, la primer máquina d’estraición de polea Koepe d’Asturies, yeren xoyes auténtiques destruyíes pol interés de la empresa propietaria pa crear un polígonu industrial –vacíu entá güei– y la nulidá absoluta de l’alministración cultural.
Meyor suerte corrió l’espaciu de residencia llevantáu por Solvay: el pobláu d’El Campiellu y el de La Pedrera, el primeru construyíu al entamar el sieglu XX mirando a la mina; el segundu, de los años cincuenta, de más baxa densidá y con un increíble casino-cine güei fondamente desnaturalizáu. En definitiva, ún de los meyores exemplos d’un paternalismu industrial nel que nun too yera ríxido y torcíu control patronal, sinón tamién un intentu d’ameyoramientu de la calidá de vida, onde los trabayadores pudieran desendolcar el so trabayu con dignidá y, hasta ciertu puntu, felicidá.
Castillete y Casa de Máquines
Casa de Máquines
Pobláu de’l Campiellu
Comentarios recientes