Aprovechaba asina les ventayes de llocalización que daba la cercanía a la fábrica de la Sociedad Metalúrgica Duro Felguera, a la que-y correspondió l’abastecimientu de los subproductos de coquización necesarios pa la preparación de medicamentos.
Les dotaciones principales de la factoría planificáronse y construyéronse nos años últimos de la década del 1940 y los entamos de la siguiente. A les instalaciones dedicaes a la producción de benzol, ácidu salicílico, fenol sintético, acéticu sintético, ácidu acetilsalicílico, acetatu sódico, ácidu acétito y esteres, súmense los edificios destinaos a sirvir como espacios d’almacenamientu, talleres, depósitos, torres de refrixeración, sala de bombes, estación de tresformación llétrica, llavabos, cocheres, llaboratoriu, oficines y viviendes pa emplegaos. Les pieces diverses del complexu intégrense nun recintu de planta irregular, zarráu sobre sigo mesmu.
Arquiteutónicamente pue sorrayase l’interés del edificiu destináu a servicios auxiliares, oficines, llaboratoriu y almacén, de llinies racionalistes; los dos edificios ximielgos que funcionen como fachada principal de la planta, y que sirvieron como viviendes pa emplegaos y residencia pa trabayadores solteros; y la nave dedicada a la fabricación d’ácidu acetilsalicílico, de dimensiones xeneroses y pendiente inclinada na so cubierta a dos agües.
La multinacional alemana Bayer, que yá na década del 1960 principiara a participar na empresa, faise cola propiedá de la planta nel añu 1981. Anguaño concentra el 100% de la producción mundial d’ácidu acetilsalicílico –el principiu activu de la popular aspirina– de la firma.
Natalia Tielve García
Comentaris recents