Astilleros El Dique

Les firmes metalúrxiques y de construcción de maquinaria foron dende entós les encargaes d’asumir los trabayos de reparación y de construcción de buques, con Riera y Cia. a la cabeza, siguida por Cantábrico, Constructora Gijonesa y la Sociedad Española de Construcciones Metálicas.

El despegue definitivu de los astilleros xixoneses produzse a partir de la década del 1940, nel contestu de l’autarquía, de la mano d’una serie de midíes d’apoyu oficial en forma de creitos –Llei de Creitu Naval del 1941, Llei de Proteición de la Construcción Naval del 1951,  Llei de Proteición y Renovación de la Flota Mercante del 1956– asina como los dos planes de Desarrollu Económicu y Social del 1964 y 1968. Al impulsu que la industria naval conoz naquelles feches debemos l’ampliación de les infraestructures y la modernización de les instalaciones, dando como resultáu un potente texíu industrial estendío a lo llargo de la franxa llitoral oeste, ente’l vieyu cai llocal y el d’El Musel; un espaciu presidíu poles firmes Astilleros del Cantábrico, Astilleros G. Riera, Astilleros de Ojeda, Juliana Constructora Gijonesa, Astillero de la Sociedad Metalúrgica Duro Felguera  y Marítima del Musel, S. A.

Los astilleros conocieron una etapa de bonanza a la que ponía fin na década del 1980 la crisis del sector, entamándose un procesu de pieslle agónicu que, más allá de les sos graves consecuencias socioeconómiques, conllevó la perda de los sos nicios. El postreru de los clausuraos, Naval Gijón, cola mayor parte de les sos instalaciones esmantelaes, sirve como sede ocasional p’actividaes culturales y llúdiques.

El resultáu de tou esti procesu foi la destrucción impune de los testimonios d’una industria naval con puxu que se vio, de forma paradóxica, sustituyida por un parque inmobiliariu nel que los modernos y costosos edificios recreen l’apariencia de barcos.

Natalia Tielve García