Puertu d’ampliu caláu y condiciones d’abrigu escelentes, entra n’operaciones nel 1907. Dende la construcción del dique Norte y del muelle de Ribera, siguiendo’l proyeutu del inxenieru Francisco Lafarga, socediéronse les ampliaciones, remodelaciones de los sos muelles y construcción d’equipamientos pa dar respuesta a los requerimientos de l’actividá industrial, comercial y pesquera: la Estación Marítima, el Parque de Carbones, l’Espigón pa tresatlánticos, dragaos nos cais, víes de tren, grúes, almacenes y oficines.
Dalgunes de les obres más importantes viéronse venceyaes, entrada la segunda metá del sieglu pasáu, al asitiamientu de la planta de sideruxa integral d’UNINSA y al desarrollu industrial del valle d’Aboño, col asentamientu de la Cementera de Tudela Veguín y la Central Térmica de H.C. El puertu perdía entós la que venía siendo la so función histórica preferente –la esportación de carbón– pa especializase nel abastecimientu de materies primes, en primer llugar a la siderurxa, pero tamién a otres de les instalaciones fabriles. Ente les obres de mayor grandor acometíes n’El Musel naquellos años ta la execución de los diques Oeste y de Llevante y l’enanche del dique Norte. L’incrementu espectacular del volume de tráficos esperimentáu na década del 1990 foi’l factor decisivu pa impulsar la polémica macroampliación fecha ente los años 2005 y 2012.
Na midida en que constitúi una obra viva y n’evolución continua, los socesivos trabayos executaos nel puertu llevaron a la perda d’una parte significativa de los sos nicios históricos. Por fortuna, dalgunos elementos d’induldable intensidá patrimonial preserváronse, como l’antiguu cargaderu de carbón y un conxuntu d’inmuebles d’entamos del sieglu XX: l’Edificio de La Sirena, l’Edificio Central de la Junta de Obras y l’antigua central llétrica qu’acueye dende’l 2003 el centru de receición de visitantes.
Natalia Tielve García
Comentaris recents