Rula de Pescáu

Tresportes

Rula de Pescáu

Llanes

Asitiada a pie de puertu, la vieya Rula de Llanes ye un espléndidu edificiu racionalista que, inauguráu n’abril del 1936, concibióse pa la receición y puya del pescáu. Como un buque asentáu en tierra, la rula conxuga planta poligonal y curva xenerando, col so desendolcu en dos altures, un xuegu acompasáu de volúmenes. La so conceición cuidada débese a Joaquín Ortiz García, arquiteutu municipal de Llanes y, al igual qu’ocurre con otros ameyoramientos significativos acometíos nes infraestructures portuaries nos años trenta, tres la obra tuvo l’inxenieru direutor del puertu, José María Aguirre.

La rula venía a reemplazar a un edificiu pequeñu que, inauguráu nel 1917, desempeñaba les funciones de depósitu y puya de la pesca; les sos dimensiones reducíes –apenes algamaba los venticinco metros cuadraos–, dotaciones insuficientes y otros problemas téunicos y de xestión, forzaran la so sustitución. Asina, la planificación de la rula d’Ortiz va responder a un diseñu racional, aspirando a llograr la máxima eficiencia y dar respuesta a les necesidaes hixénico-sanitaries que la conservación de la pesca demanda. Nel espaciosu interior asítiase una sala destinada a la puya y al depósitu. Les galeríes, organizaes n’altura, acutaes a los compradores, permitiríen ver la mercancía y entrar na puya. Completaben las dotaciones de la rula báscules, cámara frigorífica, máquina fabricadora de xelu y equipu electrónicu pal so control. 

L’inmueble, construyíu na oriella derecha de la ría, xunto a la curva del cai, llevántase sobre una plataforma de formigón sustentada n’encontos de formigón armao. No que respeuta al tratamientu esterior, na composición de fachada alternen llinies rectes y curves, remate n’azotea, paramentos revocaos y pintaos en tonu gris d’acabáu áspero. Introdúcense delles tipoloxíes de vanos, ente ellos, los óculos abiertos na fachada proyeutada hacia la mar.  

Tres la rehabilitación del edificiu, nel 2015, la vieya rula reconvertida n’oficina turística, caltiénse por fortuna como ún de los más singulares elementos del patrimoniu portuariu llaniscu.

Natalia Tielve García

GALERÍA D'IMAXES