Pobláu Mineru de La Nueva

Pero estos llugares tradicionales nun pudieron absorber la presión demográfica axuntada pola hulla bien por retención de les nueves cohortes vexetatives, bien pola llegada de continxentes foranos. Asina, nos allugamientos mineros, sobre manera nes vallines llaterales, apaecieron nueves pieces residenciales que se yustapunxeron a la estructura preesistente, n’ocasiones como productu esclusivu de la promoción empresarial, como en Lieres o Bustiello, n’otres ensin escluyir otres iniciatives privaes, presentando entós un interesante calter mestu. 

Un bon exemplu d’ello ye La Nueva, nel valle d’El Río Samuño, en Llangréu. Equí, dende l’últimu cuartu del sieglu XIX, la minería foi tomando cada vegada más entidá, convirtiendo un trozu de vega nel tramu mediu d’El Río Samuño, La Nueva, nun gran focu mineru: primero pa la salida del carbón de la minería de monte; llueu como la principal unidá productora col Pozu San Luis dominando la vega. Unes riberes que nesti procesu dirán colmatándose con funciones industriales, pero tamién con residenciales venceyaes a la minería, a Carbones de La Nueva y, llueu, al so pozu, el San Luis: los Cuarteles antiguos o los de La Sierra, dambos d’entamos del sieglu XX; los d’Uría, firmaos pol arquiteutu de la RCAM, D. Tomás Acha Zulaica, nel 1954… Toos ellos apaecen n’espacios de borde o, direutamente, na lladera, al igual que la mayoría de les promociones privaes, yá que los espacios centrales, cuando nun se reservaben pa lo industrial, yérenlo pa equipamientos como la ilesia o l’economatu. En cualesquier casu, esta función residencial nunca pudiere ser suficiente, como se mentó, ensin los llugares tradicionales preindustriales, como L’Escobal, La Mosquitera… Pero tampoco ensin los grupos de vivienda estatal, como’l de San Antonio yá cerca de Ciañu, que constituyirán un estadiu nuevu de la vivienda obrera venceyada a la minería.

Faustino Suárez Antuña