Esplosivos Santa Bárbara

Les instalaciones industriales de Llugones llevantáronse na finca de L’Acebera, a la vera d’El Ríu Nora, lo que garantizaba’l suministru d’agua. La zona, ensin desniveles y con arboláu abondoso, dexaba facer pruebes d’esplosivos y, poro, yera afayadiza pal desendolque d’estos llabores productivos. Amás, el llugar tamién yera amañosu pola so cercanía coles principales víes de comunicación hacia Uviéu, Xixón y Avilés.

La so función principal yera producir pólvora p’actividaes mineres, cinexétiques y béliques, asina como meches de seguranza. Entró en funcionamientu dos años más tarde y, nel 1886, la sociedá pasó a formar parte de la Unión Española de Explosivos. 

La so conceición partió d’un plantegamientu total: non sólo se llevantaron los edificios destinaos a los trabayos fabriles, sinón que tamién se promovió la creación d’un conxuntu arquiteutónicu nel que se construyeron viviendes pa los emplegaos, escueles y un espaciu residencial pal so promotor. En total foron trenta y cinco construcciones qu’incluyíen talleres, polvorines, almacenes, oficines y los espacios de residencia. L’entornu d’arboláu mesto favorecía, al empar, el diseñu de grandes espacios axardinaos pa usu de toles persones venceyaes a la fábrica.

Tres el so cese industrial nos años setenta, el Conceyu de Siero fíxose cola finca na so totalidá nel 1982 cola finalidá de crear un espaciu d’ociu y disfrute pa los ciudadanos. Anque la mayoría de los edificios entamaron un procesu d’estroza, anguaño’l Parque de L’Acebera ye un referente natural y cultural na zona.

El desendolcu de Llugones como polu industrial de referencia tuvo un crecimientu especial como consecuencia de la inauguración, por esos mesmos años, de la llinia de ferrocarril qu’ameyoró les comunicaciones y, al empar, favoreció la fundación nel 1895 de la Sociedad Industrial Santa Bárbara. Esta institución, patrocinada tamién por José Tartiere, dedicóse a la fabricación de fundición y productos llaminaos.

Rubén Domínguez Rodríguez