Fábrica de Conserves Lis

La estensa costa asturiana y la so arraigonada tradición pesquera foron la base del nacimientu d’una importante industria de conserves de pescáu que surtió primero a los industriosos núcleos rexonales y llueu, cola apertura ferroviaria a la meseta, al restu d’España, rescamplando Madrid como gran veceru d’esti tipu de producciones. Asina, nel 1900 Asturies ocupaba’l segundu llugar, depués de Galicia, na producción nacional de conserves de pescáu, surdiendo fábriques de salazones y conserves na mayoría de les villes costeres, un procesu estimuláu entá más na Primer Guerra Mundial. Una de les carauterístiques principales de les manufactures conserveres será la feminización de la so mano de obra, suponiendo, xunto coles fábriques de tabacu, ún de los principales medios d’incorporación de la muyer al trabayu fabril nes décades primeres del sieglu XX.

Ún d’estos allugamientos foi L’Arena, onde yá a entamos del sieglu funcionaben dos plantes conserveres qu’aprovechaben, principalmente, la sardina y el bocarte del Cantábricu y a les que se dirán sumando delles más. Pero será la Fábrica de Conservas Lis la que rescamplamos equí polo singular del edificiu que l’acoyó, que tuvo n’activu hasta la década de los noventa, sicasí pa otros usos bien diferentes del conserveru. Concebíu n’orixe como hotel y casinu, lo que llueu sería Conservas Lis pasaría entovía por otros usos, como cine y sala de baille o ilesia, enantes d’adquirir una función industrial tres la Guerra Civil. Ye un edificiu de mampostería encalada al esterior y vista nos sectores interiores, onde s’aprecia l’encintáu de los vanos con lladriyu. Organizáu en dos altures y distribuyíu en dos volúmenes –ún d’ellos ocupa una esquina– coneutaos per una terraza, constitúi un exemplu inusual nesti tipu d’instalaciones, que presenten cuasi toes cierta severidá constructiva. 

Faustino Suárez Antuña