Ferrocarril d’El Valle

Pa ello aprovechóse un ferrocarril trazáu dende Tresona a la cantera de Tamón, que s’amplió hasta Aboño col fin de coneutar colas víes de la Junta de Obras del Puerto. El trazáu, de 14 quilómetros de llargor, yera d’anchu ibéricu y vía única, y púnxose en serviciu nel 1969. La llinia incluyía fuertes pendientes y un túnel d’unos dos quilómetros en Tabaza que llegaba hasta cerca de la estación intermedia d’El Valle.

Al empar, la construcción de la planta d’UNINSA ufrió al ferrocarril la ocasión de convertise nel enllaz ente les dos grandes siderurxes asturianes. Pa facilitalo, nel 1972 construyóse una vía de triángulu n'Aboño que dexaba l’accesu direutu de trenes procedentes de Veriña al traviés de les víes de RENFE. Per ella entamó’l tráficu d’arrabiu procedente de los fornos altos xixoneses con destín a l’acería d’ENSIDESA.

Esi enllaz constituyía un engorriu pol cruciamientu a nivel cola llinia xeneral Lleón-Xixón, que soporta un tráficu ferroviariu intensu. Por ello, decidióse la construcción d’un túnel nuevu baxo El Monte Areo p’aunir direutamente la factoría de Veriña con El Valle. Entró en serviciu nel 1997 y contaba con un gran viaductu de formigón en Pervera. Finalmente, nel 2010 duplicóse’l túnel de Tabaza, colo que tol ferrocarril cuenta con vía doble.

A lo llargo de la so historia la llinia foi cambiando de propiedá conforme lo facíen les grandes plantes siderúrxiques: d’ENSIDESA pasó a CSI (1994), a Aceralia trés años más tarde, pa convertise n’Arcelor nel 2002 y, dende’l 2006, Arcelor-Mittal.

Col pieslle de les bateríes de coque d’Avilés (2019) perdió ún de los sos tráficos fundamentales, el de carbón en bruto dende Aboño y el de coque de vuelta a Veriña. A pesar d’ello, nel momento actual caltién un importante tráficu de torpedos d’arrabiu y llaminaos, amás de servir como enllaz ente les redes ferroviaries de dambes factoríes.

Magar la so modernidá, esta llinia ufre un enorme interés patrimonial como ún de los últimos testimonios n’España de las grandes redes ferroviaries típiques de la Revolución Industrial.

Guillermo Bas Ordóñez