Llocomotora SIA 1

Col fin de facilitar la salida del so carbón la empresa optó pola solución más cenciella, que foi poner un tranvía pela carretera enllazando las mines de Santa Ana y Los Pontones col llavaderu de L’Oyanco. Dende ellí baxaba hasta la Estación del Norte de Santuyano, dando accesu nel so percorríu a la fábrica d’aglomeraos que s’estableció en Figareo. Non solo daba serviciu mineru, sinón que tenía tamién trenes de viaxeros d’usu públicu, y escoyóse un anchu de vía de 750 milímetros qu’aumentaba la so capacidá de tresporte.

El serviciu corrió a cargu de delles llocomotores norteamericanes, construyíes por Vulcan Iron Works. La primer d’elles, que llevó’l númberu 1, adquirióse nel 1916 y n’orixe se dedicó al remolque de trenes de viaxeros. Coles mesmes vieno de fábrica provista d’un faldón de chapla que cubría les sos ruedes pa evitar accidentes al so pasu pela vía pública. Otros aspeutos notables d’esta máquina yeren el so tanque d’agua d’albarda o la consabida campana qu’alvertía de la so llegada, carauterístiques que perdería col pasu los años.

A mediaos de los años 30 el tranvía de la SIA clausuróse na so mayor parte tres l’ampliación del Vasco Asturiano d’Uxo a Coḷḷanzo, al tiempu que suspendió’l so tráficu de viaxeros. Namái quedaron en serviciu los ramales que comunicaben les mines col llavaderu y nellos circuló la númberu 1 hasta’l so pieslle definitivu por HUNOSA nel 1971.

Nesi momentu treslladóse al llavaderu de Sovilla como monumentu. Permaneció ellí hasta’l so rescate y restauración pol Muséu del Ferrocarril d’Asturies. Les sos carauterístiques peculiares y el so orixe faen d’ella una pieza d’altu valor patrimonial.

Guillermo Bas Ordóñez