Bautizóse como Pedro Duro y, años más tarde, recibió’l númberu 1. Yera un exemplar de dos exes, con distribución Walschaerts y tanques llaterales pa l’agua. El so diseño aunía carauterístiques de llocomotores belgues con otres de gustu británicu, con un resultáu estéticu mui equilibráu.
Tiempu depués el mesmu tipu de máquina ufrióse a otros clientes. El primeru n’adquirila, nel 1910, foi la Fábrica d’Armes de Trubia, que compró un exemplar denomináu CORONEL ESTEBAN n’honor al militar que dirixía l’establecimientu trubiecu. Taba encargada de les maniobres nel interior de la factoría y na derivación que la enllazaba cola cercana estación de Norte. Caltúvose en funcionamientu munchos años y inclusive se prendió de forma periódica hasta lo primero de la década del 1990, lo que la convirtió na postrer llocomotora de vapor d’España en serviciu comercial.
Tornando a Duro Felguera, la empresa taba tan satisfecha cola PEDRO DURO que, nuna fecha tan tardía como 1964, construyó un segundu exemplar nes sos instalaciones, que recibió’l númberu 2. Yera idéntica a la orixinal, pero la so cabina y tanques teníen un diseñu más modernu. La so antecesora reformóse entós y adoptó esi mesmu aspeutu.
Les dos máquines pasaron a manes d’UNINSA y, depués, d’ENSIDESA, y permanecieron en serviciu hasta lo último de los años 70. Tuvieron per munchu tiempu abandonaes en Valnalón hasta la so recuperación per parte del Muséu de la Siderurxa.
Polo que respeuta a la CORONEL ESTEBAN, la Empresa Nacional Santa Bárbara donóla al Muséu del Ferrocarril d’Asturies, onde s’espón anguaño. Estes trés llocomotores hermanes constitúin un exemplu espléndidu del diseñu industrial español y de cómo lo copiaron otres empreses pa satisfacer necesidaes especiales.
Guillermo Bas Ordóñez
Comentaris recents