Esta empresa suministró, ente los años 1930 y 1957, una serie de cuatro llocomotores de maniobres que llevaron los númberos del 8 a 12. Pertenecíen a un modelo desendolcáu a partir d’unes máquines entregaes dalgún tiempu enantes al Ferrocarril Santander-Mediterráneo. Contaben con trés exes motores, cilindros esteriores y tanques llaterales pa l’agua, tratando de combinar utilidá con potencia, con un resultáu estéticu bastante equilibráu. El so ésitu atestígualo non sólo’l so llargu periodu de construcción, sinón el fechu de que s’entregare otra llocomotora similar al puertu de Pasaia en Guipúzcoa.
El serviciu que daben estes llocomotores consistía fundamentalmente nes maniobres nos cais d’El Musel y nel tráficu qu’aunía éstos cola estación d’Aboño, onde se facía la correspondencia cola Compañía del Norte y, más alantre, con RENFE.
Les llocomotores d’esta serie tuvieron en serviciu hasta los años setenta, cuando foron relevaes cola llegada de la tracción diésel. De les cuatro representantes del grupu llegaron a los nuesos díes trés exemplares. La primera d’elles, la númberu 8, permanez entovía en manes de l’Autoridá Portuaria de Xixón. Depués de permanecer munchu tiempu guardada nel depósitu de máquines d’Aboño restauróse cosméticamente y anguaño ta n’El Musel, nuna zona d’accesu restrinxíu, anque s’espunxo en dalguna ocasión n’otros allugamientos.
La so hermana menor, la númberu 11, cedióse al Muséu del Ferrocarril d’Asturies, onde se pue admirar restaurada amañosamente.
Entrambes dos pertenecen non solo a la serie más representativa de les llocomotores que dieron serviciu nel puertu xixonés, sinón que constitúin una amuesa magnífica de diseñu ferroviariu español.
Guillermo Bas Ordóñez
Comentaris recents