Tresportes
Hai dalgunes pieces del patrimoniu ferroviariu que tienen un interés singular porque, más allá del so valor históricu, guarden tamién una fuerte carga simbólica. Ye’l casu de la llocomotora TURÓN 3, construyida pola firma alemana Jung nel 1914 pa la Sociedad Hulleras del Turón. Los entamos de la so vida foron enguedeyaos por mor del españíu de la Primer Guerra Mundial, al quedar esta máquina y la so ximielga, la númberu 4, per meses atrapaes nel puertu d’Amberes hasta que pudieron retomar el so viaxe hacia España.
Una vez n’Asturies, entrambes máquines punxéronse en serviciu nel ferrocarril que xunía’l llavaderu de La Cuadriella con San Víctor y que taba en plena fase de prollongación hasta’l nuevu Pozu Santa Bárbara. Anque s’adquirieron pa remolcar trenes de carbón, la llegada de les llocomotores americanes de trés exes acoplaes relególes pronto a xeres secundaries. Asina, tuvieron encargaes de los coches de los obreros, los cortes de material de construcción o de suministros pa les mines y los economatos.
Cola apertura de la llinia d’Urbiés (1942), les máquinas 3 y 4 alternaron periodos de funcionamientu nesti últimu percorríu, que sería clausuráu nel 1968. Cuando una d’elles taba en dichu percorríu, la so ximielga taba en reparación nel taller y viceversa. Nun yera un cometíu fácil por mor de la fuerte pendiente de la vía, que requería d’una pericia especial de los maquinistes pa controlar los trenes cargaos que descendíen per ella. La númberu 3, nomada ‘Cuquina’ pol personal, finó la so carrera faciendo maniobres na plaza de la madera de La Cuadriella hasta los díes últimos de la rede de vía estrecha, mientres que la so hermana esguazóse.
Llueu del esmantelamientu del ferrocarril, esta máquina asocióse inmediatamente a la so memoria: espúnxose nes fiestes del Cristu de Turón y, nel 1973, Hunosa colocóla nun pedestal con un vagón tolva n’homenaxe a los ferroviarios de la vía estrecha del valle.
Depués de venti años ellí, unvióse al Muséu de la Minería de L’Entregu, onde permaneció una década más hasta que, nel 1994, regresó otra vuelta a Turón y colocóse a la entrada de La Veguina, al llau del vieyu trazáu del ferrocarril mineru, llueu de sometese a una restauración cosmética. Esa condición de monumentu, asitiáu nun llugar mui visible, convirtióla na pieza más popular del patrimoniu ferroviariu del valle.
GALERÍA DE IMÁGENES
Comentaris recents