Pozu Santa Bárbara

Minería

Pozu Santa Bárbara

Turón, Mieres

372412960

Bocamina La Rebaldana

Fachada Principal

372673002

Economatu Mineru

Restos del ferrocarril

375481592

Ferrocarril Fortuna-La Molinera

Puertu de San Esteban

374956532

Puertu de San Esteban

Pozo Santa Bárbara

371954628

Pozu Santa Bárbara

El Pozu Santa Bárbara foi la primer gran esplotación de la hulla na cuenca del Caudal y ún de los mayores pozos mineros asturianos. Afondólu al entamar el sieglu XX la empresa Hulleras del Turón, exa central d’un conxuntu empresarial siderúrxicu vascu que buscaba abastecese y comerciar col carbón asturiano, y que se complementó con un ferrocarril, el Vasco Asturiano, y un puertu, el de San Esteban.

El Pozu Santa Bárbara, afondáu dende 1913 pola empresa Hulleras del Turón, foi la primer esplotación vertical de carbón de la cuenca del Caudal y, xunto col Pozu Espinos, siguiría siéndolo hasta la Guerra Civil, salvando’l casu del pozu balanza del Grupu Mariana, de naturaleza distinta. Hulleras del Turón, fundada y capitaniada polos hermanos Chavarri, dirá concentrando a otros empresarios vascos con intereses na hulla asturiana, como De la Sota o Martínez de las Rivas, que diríen enaxenando les sos mines asitiaes n’otres partes de la rexón pa concentrar el so esfuerciu capitalista na empresa del Turón. Y ye que Hulleras del Turón, amás de les mines, acabaría controlando un ferrocarril –el Vasco Asturiano– y, práuticamente, un puertu –el de San Esteban– p’asegurar y controlar tol procesu de remisión de los carbones hacia les acereríes vasques y llevantines, creando un auténticu emporiu industrial venceyáu a la hulla n’Asturies, pero que, eso sí, crearía’l so valor añadíu principal nes fábriques vasques.

Santa Bárbara, tamién conocíu como La Rebaldana, ye, a diferencia d’Espinos – venceyáu tamién a Hulleras del Turón– un gran pozu industrial: dos grandes castilletes, n’orixe de celosía de fierro roblonao, máquines d’estraición potentes, un modernu circuitu de xestión d’una plaza minera regularizada y ellevada sobre’l nivel del valle, instalaciones de remisión, conexón interna con otres mines del grupu… Reafondáu tres la guerra, a últimos de la década de los 50 decídese la renovación integral de les instalaciones, sustituyendo progresivamente los castilletes primitivos por otros de soldadura rixidizada, y llevántense cases nueves de máquines qu’agospiarán nueves y más potentes máquines d’estraición llétriques necesaries p’afrontar cotes de trabayu más fondes y ritmos más intensos de trabayu.

La empresa Hulleras del Turón integróse n’HUNOSA nel 1968, que caltuvo abiertu’l Pozu Santa Bárbara hasta’l 1995. Foi'l primer pozu mineru n'Asturies declaráu Bien d'Interés Cultural. Parte de les sos instalaciones fueron rehabilitaes en 2012 y, na actualidá, tresformóse nun centru d'esperiencies artístiques y culturales (PZSB) que foi inauguráu na seronda de 2021 cola esposición del artista británicu Anthony McCall..

Faustino Suárez Antuña

GALERÍA D'IMÁXENES