Bocamina del Grupu Mariana

Minería

Bocamina del Grupu Mariana

Barreo, Mieres

La bocamina ye la entrada a la mina de monte. Les empreses solíen reforciar estes entraes y rescamplar de forma especial dalguna d’elles, desendolcando formes distintes, materiales, arcos y remates. La bocamina de Mariana ye de les más impresionantes d’Asturies, con una enorme calidá y estáu de conservación, tando, amás, al llau del Pozu Barreo, del que ye un antecedente claru.

Una bocamina ye la boca al esterior de la galería que sirve d’entrada y salida a una mina, de forma habitual al traviés d’un túnel horizontal, pero tambén per aciu un pozu- planu. Cuando esta entrada conforma’l nivel basal d’una esplotación de monte compuesta de dellos pisos en lladera, pue nomase socavón. Esta entrada presenta cuasi siempre un llau de debilidá énte los argayos, de mou que les esplotaciones mineres de cierta entidá solíen reforciar estes entraes con una portada con materiales que dirán evolucionando col tiempu dende les llábanes irregulares hasta’l sillar, el lladriyu o la piedra artificial. Dende bien pronto les empreses grandes vieron nes bocamines una forma de dexar la so buelga y estilu.

Los años centrales del sieglu XIX serán activos de manera especial no que se refier a la propiedá de los cotos hulleros del centru d’Asturies por mor, ente otres razones, de les normatives socesives en materia minera y la llei de Sociedaes de Creitu, a un ciertu desarrollu de la demanda interna como consecuencia del ascensu na producción de fierros y a l’apaición d’actores nuevos nel negociu. L’área de Mariana pasó per manes distines enantes de llegar a les de Numa Guilhou na década del 1860, que desarrollará la minería del Caudal con téuniques y formes claramente capitalistes. Mariana será un llugar paradigmáticu d’esti desarrollu, llegando a funcionar col serviciu d’un pozu balanza que, práuticamente, constitúi una esceicionalidá na nuesa historia industrial minera.

La bocamina de Mariana ye una portada impresionante dividida en dos cuerpos, de sillería l’inferior, material que se repite nel superior pero rebaxáu con lladriyu. El pisu inferior acueye nel centru l’arcu rebaxáu que da entrada a la mina propiamente dicha, con vanos nos llaos que se correspuenden coles dependencies destinaes a llampistería. Organízase, asina, la portada en tres calles remataes nun frontón escalonáu. Nel tramu central, sobre un llienzu de lladriyu, apaez el nome del grupu y la fecha del 1920, que se correspuende cola d’afitamientu y acuriosamientu d’ésta.

Faustino Suárez Antuña

GALERÍA D'IMAXES