Minería
Nel 1892 constitúise una sociedá comanditaria baxo la denominación de Minas de La Encarnada, que tendrá como razón social Vigil Escalera y Compañía y como fin el beneficiu de carbón y de toa mena de minerales. El so focu principal d’esplotación tará nel valle de La Güeria Carrocera, nel llugar de La Encarná, que precisamente da nome a la empresa.
Na escritura de constitución de la sociedá Vigil-Escalera apaez yá una concesión entitulada como Sultana, que, magar qu’alloñada de La Encarnada, too paez sía esta mina de Sotrondio. El llamativu nome d’esta mina, como’l de la vecina Generala, o de los cercanos topónimos d’El Serrallo o Tetuán, punxéronse en rellación coles guerres d’África, una constante dende lo último del sieglu XIX.
La Sultana ye un bon exemplu del usu d’un material como ye’l lladriyu que nun foi mui emplegáu na fachada de les bocamines. Equí apaez nel arcu y nel muriu, utilizando’l sillar nel arranque, el remate y la clave. Precisamente na clave apaez la fecha del 1918, sicasí ha ser una reforma y consolidación d’un socavón muncho más vieyu.
A entamos de la década del 2000, el Conceyu de Samartín del Rei Aurelio intervendría nestes bocamines con poca fortuna y menos habilidá. Podríamos rescamplar como aspeutos positivos la so señalización y caltenimientu, que, per otra parte, nun tuvo continuidá.
GALERÍA D'IMAXES
Comentaris recents