Tresportes
El ferrocarril de Minas de La Encarnada punxérase en serviciu nel 1897 como una continuación de la preesistente llinia de Carrocera a Etelvina, propiedá de Duro y Compañía. Cola puesta en marcha de les esplotaciones de La Encarnada, la so propietaria llegó a un alcuerdu con Duro pa la esplotación conxunta de la parte baxa de la llinia y la so prollongación hacia’l norte, al tiempu que s’utilizaría de forma compartida’l cargaderu de Carrocera pa tresvasar el mineral al Ferrocarril de Langreo, unes condiciones nada habituales dientro de los ferrocarriles industriales asturianos.
Pa remolcar los sos trenes La Encarnada adquirió una máquina a la casa alemana Krauss. En viendo los sos bonos resultaos, doce años más tarde, nel 1909, entró en funcionamientu un segundu exemplar idénticu, que recibió’l númberu 2 y el nome Guillermo Sala, n’alcordanza del inxenieru de mines que participara na puesta en marcha de la esplotación.
Pertenecía a un modelu mui común dientro del catálogu del fabricante, con dos exes acoplaes, cilindros esteriores y tanque nel bastidor. Tuvo siempre pintada en color verde y caltenida nun estáu óptimu de conservación pol personal, condición que compartía coles otras máquines de la empresa. Los sos servicios consistieron esencialmente nel remolque de trenes de carbón hasta Carrocera.
Nel 1970 Minas de La Encarnada integróse n’Hunosa pa ser pesllada al pocu tiempu. La empresa estatal decidió treslladar la Guillermo Sala al ferrocarril de Carbones de La Nueva, que compartía’l so anchu de vía de 650 milímetros y poseía una llocomotora idéntica (la Juanco), mientres que les máquines diésel de La Nueva utilizábense n’otros llugares. Asina, la máquina vivió la etapa última de la so vida útil nel valle de Samuño, remolcando trenes de carbón ente La Puente Umeru y el llavaderu de Camellera hasta qu’esta llinia esmantelóse metanes los años 70.
Dende entós conservóse a mou de monumentu nes instalaciones del Pozu San Luis. Va unos años recibió una restauración cosmética nueva pa ser incorporada a la esposición del ecomuséu mineru y colocóse nel interior d’una de les naves del pozu, onde se pue contemplar anguaño como testimoniu del tresporte mineru n’esterior y representante d’un tipu clásicu de llocomotora dientro de les llinies industriales asturianes.
GALERÍA D'IMAXES
Comentaris recents