Naz esti muséu, como’l restu de los abiertos n’Asturies con temática industrial, nel contestu del fin de la minería de la hulla y de bona parte de les actividaes que foron la base del nuesu procesu industrializador. Un final qu’impón la busca d’actividaes económiques nueves, como’l turismu, que permitan, amás, la preservación de destacaos exemplos del nuesu Patrimoniu Industrial. Nesta llinia, dende l’añu 2000, la Fundación Comarcas Mineras (FUCOMI), al traviés de la fórmula d’Escuela Taller, fixo delles intervenciones nel pozu col oxetivu final de contribuyir a la creación d’un muséu nes instalaciones. Unes midíes que se complementaríen col restablecimientu del esplendor de la magnífica casa de máquines del Pozu San Luis, que se convirtió, gracies al proyeutu del arquiteutu Carlos Marqués Rodríguez, na meyor recuperación de Patrimoniu Industrial realizada n’Asturies.
Pero la entrada al muséu ta n’otru punto del valle, na recreación de l’antigua estación ferroviaria d’El Cadavíu, dende onde parte un modernu tresporte mineru qu’asciende de forma lenta pel valle hasta entrar per una galería que dará accesu al pozu al traviés d’un ascensor-xaula mineru. Dacuando esti tresporte, que ye ún de los grandes atractivos turísticos del muséu, faise con una llocomotora orixinal de vapor.
L’Ecomuséu de Samuño dexa disfrutar d’una de les esplotaciones mineres de la hulla más guapes, con dalgunes pieces de gran valir y autenticidá como la máquina d’estraición, los compresores, los propios edificios, los socavones Emilia y Isabel, y el propiu Pobláu de La Nueva. Queda pendiente siguir trabayando na espansión, apertura y conversión del equipamientu nun exemplu auténticu de la nueva museoloxía que faiga honor al so nome.
Faustino Suárez Antuña
Comentaris recents